البيت من سافرت يدوي به الصمت = متى تجي ياشوق تملاه بالشوق
انا اشهد ان البعد جاير وسلمت = سلمت له جسمي يقطع به عروق
متى تجي تشفيه لاني تألمت = وتمسح على صدري اياديك برفوق
مادمت في فرقاي يازين مادمت = لاخاطري يهدى ولا الفكر بيروق
البعد هبل بي وكثر بي الشمت = شمت العذول وكل ناقص ومطفوق
واليا طرى فراقك بوجهي تجهمت = ويطق في صدري ثمانين طاقوق
وبالوان طيف الهم والله تهممت = وطوق علي الحزن ..من ينزع الطوق؟
في صوتي الاحزان لامن تكلمت = وكني عن اللي تاكل الناس مصفوق
وفليت في حبك شراعي ولك شمت = وغنى لك الخافق من الوجد طاروق
تاتي بك الاشواق لامن تحلمت = واسكنتك من الشوق في داخل الموق
ياطيب الاحساس يا طيب السمت = ياغالي الاثمان ياقمة الذوق
سبحانه المعبود لامن تبسمت = كن النهار بغرة الوجه مفلوق
قد قيل كلمه بعدها يستوي الصمت = (والله ما ياصل غلاك أي مخلوق)