( الطاروق الهلالي)
يالله يالمعبود ياربي العلا=ياللي خلقت دقاقها مع جليلها
انك تثبت قلبي الي تلوع=لوعات بقعاء حطته في مسيلها
من واحدٍ عني رحل ماتمهل=غارت عليه وحطته في شليلها
ولاتأمن الايام مهما تزينت=ايام تضحك لك وجتك بحصيلها
رحل عن الدنيا وانا في شقاها=وتراكم الاحزان ما احتلت اشيلها
الا الى مني ذكرت المولى=انه يساعدني على تذليلها
والله يجبر كل منهو مثلي=في غاليٍ تحت القبور ونثيلها
تسعة عشر عمره وهاذي سنينه=مارقاه روس النايفات وطويلها
ماحدٍمن الجيران جانا يشتكي=ولاعاين الجاره وقّف يخيلها
في روضه المسجد يصلي فروضه=ولاسمع صوت المنادي يجيلها
ويا الله ياربي تغفر ذنوبه وفي جنة الفردوس جعله نزيلها
وإنه يعوضه في شبابه بجنته=وحوريةً عساه دايم خليلها
وختامها مني صلاةً على النبي=ويكفي قصير حروفها عن طويلها
(المرثيه الثانيه )
عزيلكم يهل القلوب المواليف=من حر فقدان الوليف الوليفه
ولفن لجا بين الضلوع المهاديف=مايمحي قلب العنا مستضيفه
ولفن يشب النار بين الشراشيف=مايدري ان العمر باخر خريفه
ليه وليفن فارق العام بالصيف=وهاذي سنه والدمع يذرف ذريفه
ماينفع العذال كثر السواليف=ولايسمعون اهل القلوب السخيفه
ولاينفع المهموم كثر التصانيف=والموت ماخلى النبي والخليفه
وانا يابو سلطان مابي تخاليف=الامن الهجاوس بالقلب ليفه
( المرثيه الثالثه / كانت تارسلنا الجامعه دون علمها بالامر حركت شجوني بهذي الابيات )
يالجامعه لا تبعثين الرسايل=لاترسلين لغاليٍ غاب عني
يطلب حضوره للفصول الاوايل=وانا وعلى فرقاه قلبي يوني
سنه على فرقاه والدمع سايل=عقبه معاليق الحشا يرجفني
نمونته فالناس والله قلايل=علمٍ مفيد ودين وصغير سني
ولامه وابوه مطيع واف الخصايل=ماكدر الخاطر ولا يوم مني
جعله على قبره تهل المخايل=حتى القبور الي معه يرتوني
وحورٍ من الجنه يجن له حلايل=أخير من دنياً شقاها يعني
(المرثيه الرابعه / سمعت واحد ينادي يانواف وهضات قريحتي بهذى المرثيه )
يفز قلبي كل ماقيل نواف=حراً خذنه سود الايام عني
طلع صلاة الظهر ماعنده خلاف=والعصر يحمل بالسرير أمتثني
هذا مصير العمر تاليه الاتلاف=مصيرنا الاقدار ماهو تجني
كلن يبي يشرب من المر مغراف=لوزانت الايام مايبتلني
يامعتبر دنيا الفناء حطها خلاف=اشطب عليها جعلها ماتثني
اذكر عميلاً جاء للارواح قصاف=يضرب بسيفه فالبشر مايوني
مرسول من بامره من النون للكاف=وبا امره نجوماً فـ : السماء يسبحني
أخي ابن مصاول نكتفي بهذى المرثيات وعلماً ان المرثيات كثر
ومني جزيل الشكر وكل من شاهد هذا الموضوع الله لا يريكم مكروه
اكرر شكري للمنتدى والقائمين عليه وجميع الاعضاء