بسم الله الرحمن الرحيم .... والله يكفينا شر الدنيا ,,,
هذه الأبيات قالتها الشاعره:عيده ام بدر المطيري, الذي حكم على ابنها بالقصاص وتقول ام بدر ( وكان خوال ام بدر الحروب الي بدر ذابحن ولدهم ) قبل أربع سنوات كان ابني بدر يدرس في الصف الثالث ثنوي بأحد مدارس حفر الباطن , تقول : حدثت مضاربه جماعيه بين طلاب المدرسه ونتج عن هاذه المضاربه وفات ابن خالها مفرج (رحمه الله) وقد قالت هذه القصيده تطلب من أهل الخيرالتوسط لدى خالها والدعاء بأن يتنازل خالها ( وكان الخال عسر شوي وليس من السهل أقناعه ) وتقول أم بدر :
يالله يالي بـــاب رحمتك مفتـــــــوح *** دايم على طول المــــدا والليالي
يالواحـد المعبـــود ياخـــــــالق الروح *** علمك بحالى كافي عن سؤالي
ارحـم يتيمن بين الأبــواب مطـــــروح *** نفسه تردد فيه والجســم بالـي
سر ياقلم وأكتب جوابي على اللـوح *** وسطر بيوتن مثل نظم اليــــالي
مـــدادها مــن عبره جــــلها فـــــوح *** من وهجن بالقلب ضيق بحـالى
وبلغ سلامي لحرب سالم ومسروح *** من الخليج أليا اليمن والشمالي
وأهل القصيم ونجــــد والولد ابو دوح *** والســاحل الغربي وذيك التلالي
عيني تهل الدمــــع والقلب مجـروح *** مير أفــزعولي كلـــــكم يا خوالي
الورع في سجن الحفر وأمه تنــــوح *** حفيدكم يامكرمــــــين العيالــــي
اتلا العهد به يوم شالوه مســـدوح *** وموثقن في محكمـــــات الحبالي
والحكـــم صادر والقضا يزهق الروح *** وحنا الوعــــــــــــد مابقا ألا ليالي
والله لو انه يوم الأحـــداث مذبـــوح *** لنساه وأصبر عنه مع ماجرالــــي
وونتــــي ياخــال من داخــل الروح *** ونت صويبـن طاح والجو خالــــــي
خلي العكفــــان الدناقــــير مطروح *** في موقعن تسفا عليه الرمالــي
والعــــــــذر ماينفع ولا ينفع النـــوح *** ان كان خالي ضاع فيه المجالي
والخاتمه ياعيال سـالم ومســروح *** ذبحـــت بناخيكــــم عليكم وبالي
وأصل القضيه لعب ورعان ومـــزوح *** وماقـــــدر الله ماعليه احتيالــــي
ومصـــايب الدنيا تجي يوم وتـــروح *** ولــوعاتها تـدور دور المحالـــــــى
والعفــوا مابين الأجــاويد ممــدوح *** ليــــا عفــــوا عن الحمول الثقالي
والصبر باب لأهل الخير مفتــــــوح *** والله يحــب المحسنين الرجالـــي
من يفعل المعروف والبال مشروح *** جزاه عنـــد الله عزيز الجلالــــــي
هــــذا وصــــل عدد براق يلـــــــوح *** على النبي اعداد وبل الخيالــي
( للمعلوميه بدر كان وحيد امه وبوه لا أخو ولا اخت ) وأنشالله تنال القصه على أعجابكم مع انها منتشره بين العالم بس عشان كل شي يكون في منتدانا....منتدى الموازين والسلام عليكم ورحمه الله وبركاته