السلام عليكم ورحمة الله وبركاته :
الليل طرف والسهر بين الأحداق
والصبح حلم البارحة ما ضوابه
ليل السهر يا معذبي تو.. ما فاق
من سكرته.. من غفلته.. من عذابه
ما دام حتى أحلامنا البيض تنعاق
عنا.. وش اللي .. عاد باقي نهابه
لم الورق لا ينكشف سر الأوراق
ما تشبع الأوراق جوع الكتابه
ولا تبرد الونة لهب حر الأشواق
لا(ون) مجروح النوى..زاد مابه
ولا ينفع الولهان ترديد مشتاق
أن ماشرب صافي زلال وروابه
عذر الندم ما يشرح الصدر لا ضاق
كم يجرح العزف الحزين الربابه
لا جرها المحزون من حر ما ذاق
تصرم قلوب.. وتفتق هضابه
وانا أدري انك مرهف احساس وأخلاق
مر الهوى قلبك وهجيت بابه
اللي قريته كفنه وسط الأعماق
خل السؤال يموت. موته.. إجابه
يا أطهر وصال نهايته كانت افراق
طهر الوصال اللي بداه.. انتهابه
الصبر مر وبعض الأحيان ينذاق
كم علقمٍ كان الشفاء من شرابه
اصبر وخل.. الحل.. بيدين خلاق
الله كريم ولا يخيب الرجابه
والبُعد موجع والسفر هم وارهاق
واللي يحبك درب وصلك مشابه
الله وأمانة كل ما ناض براق
ضميت طيفك والخفوق احتفى به
وسقت المشاعر والغلا جاك منساق
مثل القراح العذب.. مثل (السحابه)
لا أرخت ذوايبها لوت كل الأعناق
تخيلها شوق.. وشموخ.. ومهابه
لولا.. اختلاف.. أذواق.. واذواق.. واذواق
ما شفتك أجمل من جرحني عتابه
يا أعذب.. وأرق من الندى عند الاشراق
والطف من النساس لا أسرج ركابه
تدري وش اللي محرقٍ قلبي احراق؟
انك بعيد.. وحزن.. الأيام غابه
م...................................ش