الشعر صغته وأستهليت قوله
بذكر خلاق الملا عالي الشان
اللي حمى مكه وشرف رسوله
برسالة التوحيد رحمة للانسان
جعل السحاب اللي تدلت ثعوله
تمطر مقاديمه على ذيك الأوطان
تسقي ضلاعينه وتسقي سهوله
ويعلّها من صادق النو هتّان
لين الوطا يخضر وتزهر سبوله
وفيه أم سالم تصطفق بأحلى الألحان
دارٍ لنا فيها مواقف وصوله
يوم المفاخر والمغازي والأكوان
نحمي طوارفها بسيف إفعوله
تحكي بها الأجناب في ( غزوة إهدان )
ربعي هل العادات وأهل الرجوله
عبر القرون الماضيه وأمس والآن
ليا بغوا قفرٍ بعيد إنزعوا له
ماردهّم عنه الخطر وين ماكان
وليا غزاهم غازيٍ وإبرزوا له
كادوه على كيده وردوّه خسران
يوم المنايا والنفوس إمحفوله
حنا ترانا مقود أولاد ( ديحان )
حنا سلالة شايبٍ له بطوله
اللي ذخر ( هجرس و مجرس ) للأزمان
اللي ركب فوق الشداد وذلوله
وفي ( مطرقه ) بداية العز والشان
ياللي مشيت الدار عرضه وطوله
إنشد وتنبيك المواقع بما كان
إنشد عن ( الهضب ) المسمى وحوله
تلقى علوم القوم وقبور شيخان
ولنا على منادي ( الهضب ) جوله
ونكسر على العد الهلالي بمقطان
وادي ( الجريسيه ) ترنا إنزوله
الوادي اللي ينحدر بين ضلعان
إلا وحاربنا من ( الترك ) دوله
( بالحشوريه ) يوم روغات الأذهان
ومثل ( إبن جملا ) بالفخر والكموله
اللي جمع دين وشجاعه وسلطان
مشى بنمراً للحروب إمعموله
يومٍ غزاه( الضيط ) ماعلّق العان
وفي سابقة شلفاه جات إمحموله
قام وشلعها قال شلفاء كحيلان
وإعرف ترى فالقوم باقي زحوله
واذكر مغازي ( هادي بن بلادان )
و ( خضران بن صالح ) ليا صوتوا له
عطبه مضاريبه وله بالفخر شان
( وغلاب أخو غلباء ) ليا نعموا له
ورث لجده ماكسبها بالأثمان
يوم انتوى خصمه وغارت خيوله
في هدّته يطرح نوادر وعقبان
( ومحمد المجنون ) ياحي زوله
ليا ركب يصعق على الخيل بإجنان
واذكر ( جزاء ) ياللي ذكرت البطوله
اللي بسيفه شال هامة ( زهيان )
واللي بفعله معجزه من يطوله
وقف ورى ذود ( الدياحين ) ضمان
وافتكها بالسيف وأوفى بقوله
وهوه لحاله بس شلفاه وحصان
هذاك ( ذاير ) ماكسبها نحوله
( إبن كريكر ) من صوارم وفرسان
واذكر ( حنس ) ترى الجميع اشهدوا له
( راع الثنّيه ) ذكرها للعرب بان
وإنشد عن { العفار } وإنشد نجوله
اللي عفر شيخ السبايا ( طليحان )
هذاك { ثامر } يوم ضاقت عنوا له
أسم على جسم وسلايل ( سحيمان )
وليا غزا ( فالح ) وربعه بروا له
بأولاد ( مدوح ) جاب حلوات الألبان
( ومقحم ولد خضران ) يوم اقبلوا له
أرخى العنان وهد بالسيف الأمتان
واللي لهم طيب الفعول معزوله
ليا ذكرناهم ذكرنا ( بعيجان )
وامدح ( عويد ) وانشد اللي غزوا له
على ذراعه حدّهم بإم نيشان
في ليلة ظلما ونارٍ شعلوله
حد ( الظفير ) وفك زينات الارسان
وترى ( اخو حصه ) كل طيب ينوله
في مجلسه تلقى كرامه وضيفان
وترى المواقف والفعول معقوله
والحض والسمعة كسبها ( غريبان )
آخذ صحيح الهرج واترك سموله
والصدق له عندي ملافي وبرهان
واعرف رموز الشعر وانقض فتوله
وآزن بيوتي قبل تعرض بميزان
وفي مدح ربعي لي معزة وطوله
والمعذره كان المثل فيه نقصان
ذكرت رمزٍ من رجال الحموله
واللي بقى رفيع قدره ( ولا هان