السلام عليكم ورحمة الله وبركاته
اول مصافحه لكم وسبق واني نشرتها في منتدى قبيلة مطير واكثر من كم منتدى
كريـم يابـرق تسابـق قنـوفـه=يمطر على الصمان ويسيل واديـه
بيض الغمام اللي تعاقـب ردوفـه=وعقب الجدب تخّضر وتنبت مراعيه
شوفه يسر العين يومـي اشوفـه=واسج رجلـي واتمشـى بحراويـه
اخيرِ من وجه النكـد والحسوفـه=وجه النكد ماحد يبا شوف راعيـه
ضعوف الرجال ومسكنتها الضعوفه=في مجلسه كـل النشامـا تهبيّـه
في مجلسه فيـه العلـوم مخلوفـه=واعوج لسان ويابسـات ٍ نحاويـه
والقلب الاسود ينقله وسط جوفـه=ومناظـر لوجـه يشبـه مواطيـه
والمصلحه والملعنه مـن وصوفـه=ويشذب عراقيب العرب في حكاويه
ونفسه عن دروب المراجل عزوفـه=قليل عـرف ولالقـى مـن يربيـه
وترى السفيه اليوم يلقـى سفوفـه=يمشـي ويلقالـه مسفّـه تباريـه
والا الصخي لطيب طالـت كفوفـه=يتعب وطالـت للطويلـه يمانيـه
وراع الشجاعه نجدته من سيوفـه=يروي غليلـه بالملاقـى ويشفيـه
وراع الشكاله مايحسـب الكلوفـه=وراع الوفا دايـم بعيـده هقاويـه
وراع الجمايل ينعـرف بمعروفـه=وراع الحميه ينعرف مـن عوانيـه
وراع الكرم مايجهلونـه ضيوفـه=ماصك باب البيت في وجه ناصيـه
وراع النمايم ينعرف من وصوفـه=دايم يفـرق بيـن غالـي وغاليـه
وراع الخيانه لـو يكثـر حلوفـه=دم الخيانه جـاري ٍ فـي مجانيـه
وراع الظروف اليوم عذره ضروفه=واجب على الاجواد ظرفه تراعيـه
وراع الجزاله ينعرف من حروفـه=والشعر فن وحبك وسبك بمعانيـه
وراع الهفوف مصيّفن في هفوفـه=وراع الحفر متربـع ٍ فـي مفاليـه
هذا الزمـن والله يكافـي صدوفـه=كاس ٍ تخالط فيـه مـره وحاليـه
الضلع عقب الذيب يقنـب خروفـه=والبوم قدم الحـر ينفـخ علابيـه
ويمنى بلايسـرى تراهـا معكوفـه=قد قالها قبلي السديـري وانااتليـه