المحاورة بتاريخ 23/11/1430
خالد الوبيري الشمري
سلام الله على المطران والمطران=قبيله من قبايـل نجـد معروفـه
مادامك واقف بصفي يأبو راكان=لحى الشعار فالميدلـن منتوفـه
ملفي الميزاني
هلا يامرحبا والنـور تـوه بـان=بمندوب الطنايـا واهـل الكوفـه
وصلتك يالوبيري واضرب الميدان=وكلن وسط جيبه شال مصروفـه
خالد الوبيري الشمري
يبين النور من حضرت بني ميزان=رجالً بالوفاء والطيـب موصوفـه
ترا العربان أحد رابح وأحد خسران=زمـان العولمـه لاتأمـن ظروفـه
ملفي الميزاني
الا ياللي لكم طبع الكرم عنوان=وكلن ينولد طيبه وسط جوفـه
لاترجع غير كفك ياولد مليان=لاتقبلها من العربان منصوفـه
خالد الوبيري الشمري
أنا مأرسل رسايل مالها عنوان=ولا أحب البيوت تصير مكشوفه
لقينا فالبحور اللول والمرجـان=ورحلتنا بفضـل الله مخلوفـه
ملفي الميزاني
عرفنا وش تحوز بضاعه الدكان=بعد ماشفت ويش تخبـي رفوفـه
نصيحه يالوبيري تلعن الشيطـان=ترى خيل اللقا من عصر معسوفه
خالد الوبيري الشمري
بضاعه تحتوي من غالي الأثمان=مايلحق من شراها والله حسوفه
ليا من ركبت الحبه على النيشان=تشوف الموت واللي معك بيشوفه
ملفي الميزاني
تشب النار وتوخر عن الدخـان=عسى الرجال ماقصر مع ضيوفه
نهار الكون وش حيلتك في شامان=ياراع البندق اللي تضرب الطوفه
خالد الوبيري الشمري
مليفي جابله حجه بـلا برهـان=أظنـه ياجماعـه زايـدً خوفـه
أنا والله مأحب أجامل الغشمـان=لاجيت الخصم أحشره وأكتم بلوفه
ملفي الميزاني
علامك يالوبيري تضرب الجيلان=ترى الجلسه على ماقيل محفوفه
وانا خصمي نهار الكون يافهمان=اخلي راسه ينشد عـن كتوفـه
خالد الوبيري الشمري
أنا صاحي وأشوفك تصدم الجدران=بعد شفت المعارك رفعت سيوفـه
ياليت مطير دونك تقفـل البيبـان=بيوت الشعر قمت تلخبط حروفـه
ملفي الميزاني
انا لو جيت اسولف وانشد الشيبان=عن اللي مختلط قطنه على صوفه
يقولون الوبيري وافهـم العنـوان=اثر في شمـر الاجـواد ملقوفـه