غرد فرح في سما الصمان ياشـادي=والعب بسبق جناحك في هوى نـوده
غرد وانا لي معك ماقـف وميعـادي=واليا سهجت الحن نعطيك مـردوده
وان عودت للبكار الشعل الاتـلادي=معنا مشاعيف شعل ذكرهـن شـوده
مادوجن بالبلد من عام ابـن عـادي=وش للحاوي وشهن شعل بن عـوده
لباعر مطير ذكـر فـوق الاشهـادي=في سبع الـوان اباعرنـا بهـا زوده
صفر دبس والنواظر شعل وحـدادي=اذيالهـن شبـر والارقـاب ممـدوده
هدب هدل للمصوت شخص شـرادي=كزت ظبا اليا ندبت لهن على القـوده
لشعافهن مع سنا الحمره تمر عـادي=كـجمر نارسرى النسري على عوده
واوبارهن كـالحقل في حور بغدادي=ولا نواوير حربـث بـرق سامـوده
ومعنا مجاهيم دهـم وجيـه ركـادي=جهام ليلـة قـدر بالخيـر محمـوده
ليلة قـدر مبرهـزه جوهـا هـادي=سكانهـا خشـع العابـد لمعـبـوده
دهم طخم ريش روس سموعهن بادي=كـروس شلف نهار الكون ممـدوده
ريش زهاها على الاكتـاف لبـادي=ملمس حرير الشرازي عالي الجوده
ومن المغاتير معنا وضـح سنـادي=وضحا على شف راعيهن ومقصوده
تهيض فيهن مشاعـر كـل قصـادي=اليا صيح لاقصى الطياح ولد للموده
ضحاح جنب الضويحي مع شفا وادي=اليا عاد من صيحت ماهي بماكـوده
ومعنا من الزين مايحصيـه عـدادي=وشهودها حيـه تـرزق وماجـوده
بنات عبدان معنـا ورث الاجـدادي=ماهي علينا حديثـه عهـد ومولـوده
وعليا بن علوش فيصل مالهـا لادي=والشرف مع غيرنا ماهي بموجـوده
حامينها الامـار رجحـان الاولادي=حامينها يـوم كـل حامـي حـدوده
يومنها بيـن اهلهـا حـد وعنـادي=ولايدحم الرجل ضده كود بعضـوده
وقفه لشمط اللحـا مافيـه مقعـادي=كل تثولث بـه الصفـرا ورى ذوده
لوتحذا خيلها الاخصـام وش عـادي=ماهي علينا العدا بالنصـر موعـوده
نرسي لهم مثل مايرسـن الاوتـادي=بالعزوه اللي على الاجداد معهـوده
واليوم يوم الامن فالمملكـه سـادي=نتبع هواهن من الخفنه الى السـوده
من حيث مالاح برق وهـل رعـادي=نمشي طرب والحيا نرعاه ونـروده
ونجيب علم الربيـع لكـل نشـادي=حيثنا مـن رجـال تاصـل حـدوده
ونحف عشبه وجا للقيـض ميعـادي=وكل مثل مايقولونـه نصـا عـوده
لنا على مـارد الصمـان ميـرادي=على طـوال تلاطـم جـم بـروده
ومصدارهن يم حسنا السبق مسنـادي=ترتع بجيانهـا مـا هـي بمطـروده
من جو حسنا الى ساقان من غـادي=الله يسقيه مـن مـده ومـن جـوده
فيهن فخرنا وبهن الشـوق يـزدادي=وكلٍٍ يماري هـل الاذواد فـي ذوده
عاشت لحا شيوخ حطوا لهن نـادي=وجوايـز قيمـه ماهـي بمحـدوده
للصفر من سنها الرابع الى الحـادي=ومزاين الشعل من حقـه ومفـروده
والاالمجاهيـم معنـا حقهـا بـادي=لها الجيوب الكلوزر صف مرصوده
وللشقح شد الجميع لااللي ماهوغادي=قـد لهدبـا وهدبـا هديـب بقـدوده
من طيب شيخنا كسـاب الامجـادي=عاشوا لنا وكل شيخ جاب موجـوده
طيب الشيوخ القديم بروس الاحفادي=الطيب موجود والشيخـان موجـوده
الله خلـق شيوخنـا للطيـب روادي=كالطيبه في نواصي الحصن معقوده