حي الاميـر اللـي يقـود الطوابيـر=نايـف ليـا شـب الفتايـل زنـدهـا
يانايف ان كثـرت علينـا المحاذيـر=عبدالله ابـو المملكـه وانـت اسدهـا
الله يحفظكـم لنـا ذ خــر يامـيـر=ويبقيكـم سنين(ن)طويل(ن)امـدهـا
ننصـاك يامنبـع طـوال الاشابـيـر=لـو دونـك بحور(ن)تلاطـم زبدهـا
تكفـا يانايـف يازبـون المخاسيـر=انت عضيـد الـروح وانـت سندهـا
قلته وانا ادري مابدى منـك تقصيـر=هـاذي شهـادة حـق كلـن شهدهـا
فـي ظلكـم عشنـا بمعـزه وتقديـر=باءمـن وحياة(ن)مايعـدد رغـدهـا
وكان ظـل اهـل البـدع والاساطيـر=غرربـهـا شيطانـهـا وافتـردهـا
باعمـال جرم(ن)مالهـا أي تبـريـر=بايدي تطـاول شرهـا مـن حسدهـا
يا الله يامهلـك هـل الفيـل بالطيـر=عليـك باللـي نعمـتـك ماحمـدهـا
ماهـم بكفـو للوجـيـه المسافـيـر=اللـي تناصحهـم بصـادق عهدهـا
حط القنابـل داخـل احشـاه تدبيـر=مابـه خفيـر ولاجهاز(ن)رصـدهـا
في شهر فيـه يكفـر الذنـب تكفيـر=وهـو جايـن بنيـة غـدر معتمدهـا
لكـن حمـاه الله ولــي المقـاديـر=باعمـال بـر(ن) بالخفـا يستنـدهـا
هاذي ثمـار الخيـر يافاعـل الخيـر=يـاالله يارحمـن بــارك و زدهــا
عنـدك صقور(ن)ماقنوهـا الصقاقـر=واهل الوفا شـرواك توفـي وعدهـا
مدربـه و تسخـر الصعـب تسخيـر=و اليا بـدا الـلازم ينومـس هددهـا
وانت الذي يبدا لـه الـراي ويشيـر=وكلمتـك كـل المملـكـه تعتمـدهـا
يصغرلك المجـرم ولوماهـو اصغيـر=من جـل خوفـه يعتـرف ماقصدهـا
اسئل وانا اقول الك وش صار؟ويصير=؟عـن امهـا وقـول راحـت فيـدهـا
وش صار في سود الليـال المدابيـر=هم انتشـر فيهـا وهـم(ن) هجدهـا
الحال حدر مـن عنـا الهـم تحديـر=والكبـد كـن يـدق فيهـا وتـدهـا
نفس(ن)شكت من هول روعه وتفكيـر=تنخـاك ياطـب النفـوس وسعدهـا
تقـول شـي يحيّـر العقـل تحييـر=كيف الفضاء والكون كلـه جحدهـا؟
شالت حمل ماشالـه طويـق والنيـر=الله يعوضـهـا بـصـادق جلـدهـا
تشوف صورتها على منتـدى مطيـر=وتفـز تبغـى تضمـهـا ماتجـدهـا
تبدا تصـور خافـي الغيـب تصويـر=تشكي وهج نـار(ن) تصالـي وقدهـا
تسئـل؟ سـؤال ولاتجـد أي تفسيـر=الله يلـوم الـلـي يـبـي ينتقـدهـا
تقول هـي حيـه؟ لهـا أي تعبيـر؟=والا؟ولاهــا مجرم(ن)مضطهـدهـا
هي عايشه ترزق؟مع النـاس وبخيـر=او ميتـه؟ والـدود يرعـى جسدهـا
هي نايمه؟والامـع اللـي مساهيـر؟=هــي فالدفا؟والا:فبرد(ن)صـردهـا؟
وش عاد لاهبـت ريـاح ومعاصيـر=اليـا تسـاوى بردهـا مـع رعدهـا
هـاذي تـرا بعـض المعنـاة ياميـر=ذكرتهـا والخافـي امــر وادهــا
كانت تنـام بحظـن دافـي وتوقيـر=بعيشة ترف من يومهـا فـي مهدهـا
تصحي على تغريد صـوت العصافيـر=وترفـع بميناهـا نواعـم جعـدهـا
تعيش في بيـت التـرف والتياسيـر=في ظل رجل(ن)ماسئل عـن عددهـا
راع الوفا سلطـان ريـف المساييـر=اللـي لضيفـه حجـتـه ماعقـدهـا
اللي كساهـا مـن الجواهـر قناطيـر=مـع جايـزة مليـون للـي يجـدهـا
مايشكـي؟الا تشتكـيـه المشـاويـر=ياكـم دار وكــم ديار(ن)قصـدهـا
وش عاد خلا مـن قيـاس ومعاييـر؟=حتى الجبـال الصـم اظنـه نشدهـا
لو قيل له فوق السمـا فـوق ليطيـر=ولايرجـع الا كـود يــده بيـدهـا
اخشى على سلطـان كثـر التفاكيـر=اربـع سنيـن وليلـتـه مارقـدهـا
غاير على بنتـه وانـا مثلـه اغيـر=البنت(بـنـت مطير)وانـا ولـدهـا
كل القلوب اللي بهـا رحمـه اتغيـر=ولابـه قلوب(ن)همـهـا مـاوردهـا
يمكن بعـد بكـره نسـوق التباشيـر=وتشفى العيون الساهره مـن رمدهـا
وان كان غابت شمسها ماانتهى السير=مـا تكفي(النايف)نصايـب لحـدهـا
ليقـول لـك قـدام مافيـه تغيـيـر=خلف الوجيه الضالـه عـن رشدهـا
ويجرهم جر السوانـي علـى البيـر=ولا تنتهي وان كـان سجـل سندهـا
تحـرره كـل المـجـلات تحـريـر=وكـل الجرايـد تكتبـه فـي عددهـا
ولااحكم عليهم محكمـات المساميـر؟=لاعاد تسئـل ويـش يحصـل بعدهـا