قلنـا متـى الميعـاد زاد الهـم زاد=ياللـي فتلـت قيودنـا حـل القيـاد
أنا الأسير اللي معـذب مـن سنيـن=كم حسبـة كسّـر علـيّ حسابهـا
خطاك جر القلب من وسـط الحشـا=تلعبنـا لعـب المحـالـة بالـرشـا
فينا ترفـق لا يجـي قلبـك متيـن=ارحم ترى الرحمـة وسيـع بابهـا
بوجودكم نسمر بساعـات الرضـى=ونجدد المبنى وننسـى مـا مضـى
العشق يطبع في قلـوب العاشقيـن=طبعـة حـروف طبعـت بكتابـهـا
نت الـذي حبـك يزلـزل بالعقـول=وأنت الذي من شاف زولك وش يقول
يضع فكـره بيـن خـدك والجبيـن=وعيـون تاخـذ عسكـر بحرابهـا
جرحتني جرح الحديد بسلـك مـاص=حملتني تسعين رطل مـن رصـاص
هذا خطا يا صاحب الوجه الحسيـن=خليـت عدوانـي تـحـد أنيابـهـا
والشجرة اللـي قـد سكنـا بظلهـا=ذيك السنه خضراء وأنا جـار لهـا
كم ليلـة عشنـا تحتهـا سامريـن=والروح ما تسلـى بغيـر أحبابهـا
وأقول ياليـل الحـلا ليتـك طويـل=حلحلت حالي حلحلة حـل الرحيـل
واللي بنا الكعبه وذيـك المسجديـن=إن الحبايـب مـا نجـوز إلا بـهـا
وأحبابنا من دونهـم ذيـك الحـدود=اللـي مطوقـة بصفـات الجـنـود
تحت السما فوق الأراضي عايشيـن=تبكـي عيونـي والفـراق أسبابهـا
وأسبابها الفرقى بعـد كنـا جميـع=نلعب مع الأشجار وأزهـار الربيـع
في ليلـة مـا ناظرونـا حاسديـن=ذيـك الليالـي ليتنـا عشنـا بهـا
يا مغرق العاشـق بلجـات البحـور=الميتين من الهوى نصـف القبـور
على هواكم هزنـي شـوق وحنيـن=كلمتك لو هي ضدنـا نرضـى بهـا
للشاعر خلف بن هذال