حياك اخوي بناخي الزحزوح وأشكرك على أستضافتي في موضوعك هذا
وهذه هي إجاباتي على الأسئلة:
س1/ كم كان عمرك اول ماتعلمة السواقه!؟
تلعمت السواقه وكان عمري حوالي 12 سنة
س2/ من الذيساعدك على تعلم السواقه؟
اخوي الكبير رحمه الله والد المشرف العام (الفارس)
س3/موقف طريف حصلك عند تعلم السواقه؟
يا هوووووووووووووووووووه بلاش ...بلاش هي مواقف مش موقف فمن تعلق على قشعه الى هبوط اضطراري في حوض برسيم الى تجنيحات من الخط كثيره ولكن أطرف واحد هو أنني في بداية التعلم كنت أسمع بالتفحيط والحركات اللي يسوونها أبطال أفلام هوليووود في السينما وكنت اتابع كثيراً من الأفلام وخاصة افلام السيارات نعود للموقف
في بداية تعلمي ذهبت انا واخي عبدالله رحمه الله الى مزرعة والدي رحمه الله في منطقة البدائع الوسطى وكانت مزرعة كبيرة جداً مما تهئ مناخاً ملائماً لتعلم القياده , كان قبل كم يوم تعلمت أساسيات القيادة ولكنني لم اتقنها ومنذ ان تعلمت تلك الأساسيات كنت أريد تطبيقها على اوسع نطاق وبسرعه لأن الوقت يمضي <<وش مستعجل عليه الأخو؟؟؟؟
المهم في ذلك اليوم كانت نيتي مبطنة في تحقيق الهدف الذي في يدور في رأسي ألا وهو القيادة بطريقة المحترفين في الأفلام ولا يضر من بعض التفحيطات ههههههههههه (جمس بوند على غفله) المهم بدانا درس القياده وكان اخي يحذرني ويقول انتبه وخلك ماشي شوي شوي وهلما جرا ..بس انا أقول في عقلي الباطن (هين) هههههههه المهم دربني على بعض الحركات وشاف اني زين لأنني كنت أريد كسب ثقته حتى يفتح لي المجال للشارع المكنكر وهو طريق مردوم او skid road ..لفينا كم لفه ووطينا كم قشعه وهو بعض المرات يتنرفز ويقول لي : هالحين انت ما خليت ولا قشعه ألا وطيتها وش فيك ما تشوف؟؟
قلت: خلنا نروح للمطينه وتشوف القياده الأحترافيه اما هنا كله قشع وطرق ترابيه وتبي تدبل كبدي وتبي تكسر سيارتك الجديده وكان معنا ددسن مديل 83 وكانت مديل السنه على ما اتذكر ..
وافق أخوي على مضض واخذ علي التعهدات وانا أقول هين بس خلني أمسك المطينه ويصير خير !!!
طلعنا من المزرعه واخذنا المطينه وما امدانا نقول سلام عليكم يا مطينه إلا وانا شادها بالأول وبسرعه واخوي يقول هد السرعه ..هد السرعه ....وتلتف السياره بي والفها شمال ..الفها يمين والفها شمال مرة ثانيه وتتوجه بنا لعقم كان بين المطينة وبين مزرعة واحد من الجماعه الله يستر عليه وتنط بنا العقم وإذا بنا في احد احواض البرسيم وقد قفزت بنا السيارة قفزة كبيره (فيما بعد عللنا قوة الطيران انني الله يستر علي جلست دايس على البنزين هههههههههههه) المهم يوم حولنا في حوض البرسيم لانا في موقف لا يحسد عليه وكان على راسي الظاهر 50 عصفور وعلى راس المرحوم علامات أستفام وتعجب !!! كيف وصلنا الى هنا بهذه السرعة وبغمضة عين...
وهات يا سب وقال الله يرحمه بلاوي زرقا مثل : يا ح...وهلم جرى بس ما ينلام الله يلوم اللي يلومه ..المهم المشكله هالحين السياره لا تروح لا ورا ولا قدام ووسط الحوض والحوض أصلاً محفور ولم يزرع يعني يا سلام سلم تغريزه على كيف كيفكم وورا السياره العقم وقدامها الأحواض وكلها محفوره..
وكان همنا الوحيد ان نخرج من هذا المأزق المخجل قبل وصول صاحب المزرعه وهو بالعادة لا يكون متواجداً في هذا الوقت ولكن لسؤ الحظ ونحن نحفر للسيارة ونحاول إخراجها إلا وهو يقول : سلام عليكم!!!
عاد دورنا م تلقانا موقف محرج للغايه .. واصبح يلف ويدور حول السياره ويقول : تغريزه وآمنا بالله ولكن انتم من وين جايين وكيف أستقريتم في هذا الحوض ؟؟
قلنا : امر الله قوي واخذ أخي يشرح له الوضع ويخبره بانني كنت تحت تأثير نشوة القياده ههههههه وبرضه عطاني كم كلمه من اللي يحبهم قلبك
المهم ما طلعنا سيارتنا إلا بالحراثه هههههههههههههههه وبعدها أخوي ما عاد يثق في أبداً
وهذا هو اطرف موقف وبعدها صرت أسوق بكل ركاده (فطيراننا) اللي حصل كاد ان يقتلنا لولا حفظ الله
س4/ مانوعالسياره التي تعلمة عليهاءبالصوره اذا كان هناك صوره؟
ددسن موديل 83 وددسن أيضاً 78 ميلادي الصورة لا يوجد للأسف.
س5/ هل تعلمة سواقةسيارات النقل الثقيل؟
لا ..أبداً
س6/ مارائيك بتعليم الطفل السواقه بالصغر هل يضر ذلك عليه؟
اكبر خطأ وانا ضد هذه الطريقه فالقيادة فن وذوق وأخلاق وهذه لا تتوفر للطفل للأسف وربما يقتل نفسه واهله والآخرين.
أشكركم جميعاً وارجو ان أكون أضفت شيئاً مسلياً ومفيداً للموضوع