يانشـرة الاخبـار مانيـب ملـزوم

يوم اني اسمع كل موجـز وتقريـر

تبدي على انجوم واتنكّـس انجـوم

وانا معك للصبح من بعـد الاخيـر

عل وعسى تصدر ابشاره ومرسوم

عن سيدي سلطان واتبشـر إبخيـر

مرت سنه جازت عيوني عن النـوم

عيـن لواشنطـن وعيـن لغاديـر

وانا اتحرى اعلـوم وادوّر اعلـوم

علّه يجينـي مـن جهتهـا تباشيـر

والله ياسلطـان مـانـي بملـيـوم

من كثر مالك مـن محبـه وتقديـر

ياميـر ماهلـت دموعـي ولايـوم

الابعد طّولـت غيبتـك يـا أميـر

ياراعـي الجـودات ياسيـد القـوم

ياللي بعزمك تجعل الكايـد ايصيـر

يارادع ٍ الظلم عـن كـل مظلـوم

ياكاسـر شـح الليـال المعاسيـر

مواقفك كم نفسـت صـدر مهمـوم

غارات بقعا يمـه إتشـن واتغيـر

ماينحرم من فزعتك غيـر محـروم

ناشه زمـان مـن لياليـه تقصيـر

يمناك ياجزل العطا والكـرم ,تـوم

من غيرك ايمد الذهـب بالقناطيـر

أوامرك يخضع لهـا كـل زيـزوم

ومن نفضة احجاجك اتفز الطوابيـر

لا الفارسي كسرى , ولاقيصر الروم

ولاعنتر العبسي , ولاسالـم الزيـر

حظيوا بما تحظى من امجاد واقسوم

يامير مجدك غير وامجادهـم غيـر

يانجل منهو في الصعيبات شغمـوم

عاشق دكيك امعسكرات المساميـر

عبدالعزيز اسم لـه الغافـل ايقـوم

وعلى صداه إيلج صوت الجماهيـر

بشر متى الجيه عسى راسك ايـدوم

يابهجة الشايب ويافرحـة إصغيـر

وان كانها طالت بذا الحال,,ياقـوم

ماعـاد والله نحتمـل زود تأخيـر

ياطير ياطير السعـد مبعـد الحـوم

ياليت لي مثلـك جناحيـن واطيـر

وابعد حدود إديار . واعانق اغيـوم

واطوي المسافه بين بيشه وأغاديـر