من قال يا خلي تناسيت ذكراك
................. يكذب ورب البيت مانيب ناسيك
إن غبت عني وش حياتي بلياك
................. وإن جيتني كل الجوارح تحييك
الشعر كله ما يوصّف حلاياك
................. ياقف بي التعبير لا جيت أسمّيك
ما همّي إلا من تزعّلك وارضاك
................. أرهن حياتي تحت رحمة أياديك
يا زين ما تشفق لحي ٍ ترجّاك
................. شف دمعته يوم التجافي بدا فيك
يا زين لا تفرح بي أعداي وأعداك
................. وأتبع طريق اللي يحبك ويغليك
حلفت لك بالله ربك ومولاك
................. أني بغالي مهجة الروح أفديك
ذخرت لك عينين بالليل ترعاك
................. وأبقيت لك قلب ٍ من الود يعطيك
يعشقك من راسك إلى حد ماطاك
................. نبضات شريانه تنادي بأساميك
المعذره وش هو مكاني بدنياك
................. إن قلت لك دنياي ما بين كفيك
يموت حزني واشتياقي بملقاك
................. ويلعب بي الهوجاس لا جيت أخليك
حتى المكان اللي أنا فيه وإياك
................. اليوم يبكي من سبايب تجافيك
والله يا حظي تجاهلت معناك
................. لين أنها كبرت عليه معانيك
أبكيك يا حظ العنا آه ما أقواك
................. أخذتها من فرحتي يوم أناديك
هاذي ترى القصه وهاذي ضحاياك
................. متساويه عندي ولا عدت مخفيك
منقووول