سلام الله سلاماً مايحول من سماه نجوم = رفيعاً مستواه وهيبته من دون واجبها
يشرفني وانا في واجبه ومسانده ملزوم = لزوماً واجبه والواجبه ماني مجنبها
سلاماً ماتضيق ابه الصدور ولاش فيه ثلوم = تلب اله العقول اللي على المله يخاطبها
هبوبه عامره بالورد والريحان واليشموم = ونوره كوكباً دري غطا الصمان واطربها
علي روس الشيوخ مجيرة الخايف حجا المظيوم = صناديد الرجال وفعلها يثبت مناصبها
حمول الخيل فرسان الملاقا مشبعين الحوم = مرويت الرهاف اللي مذهبةً مقاضبها
منزحة العدا عوق الخصيم وسيفهم ملحوم = تعي بنصرها لو كان طايفةً تحاربها
ليا ثار العسام وجاء بريد الموت فالحلقوم = عوايدهم يعزلون الجماجم عن مناكبها
علي محوالهم مثل الصواعق في نحور القوم = وتكسر بارق القومان وتشتت شعايبها
وسادوا فالجزيرة قبل حكم الشايب المرحوم = ويرعون الخطر والخوف في نجد ومضاربها
بهم حم الذرى ترعى نبات الوادي الماسوم = علي مشهاتها شرق الدير والا مغاربها
ولايخطم علاها لان تاخذ قيسها المعلوم = علي مشهات خطّرها ونبت ارضاً يناسبها
تحت سيف الدويش اكبر زعيم القايد الزيزوم = يقطّع روس افاعي نجد ويخفّس عقاربها
يجر البارق اللي ما حظاه الا قوي عزوم = عبر شبه الجزيرة والعراق افنا مصايبها
وسادت هيبة الدوشان مافالعلم حب خشوم = كواكب مستقله في سماها من يواكبها
الا يانجد من ماضيك في صحراك نقش رسوم = ابا اقبّل رسوماً فيك تجذبني مجاذبها
واعيشك يازمان العام ذكرى في زمان اليوم = ابذكر مفخرة ماضيك واحضنها واعيش ابها
ابسري تحت شعت نورها ليل الدجى المعتوم = تنور لي طريقي في مساري واستدل بها
وتعرف وين يمات البحر يالساري المنجوم = وتنزل بالغروب اللي تناضح مع جوانبها
وتبرى عينك الرمدى ويبرى قلبك المسقوم = وترفى الرجل وتدراي عليها ماتنشّبها
تميّز فالامور ان كان في بالك وهم وهموم = ترى ضيم اللحى واذلالها دقمة شواربها
ركون امجادنا ماتندثر وكتابنا مفهوم = على طول الزمان وشمسنا محدن يغيبها
ظهر فالعلم فراعه وفزاعه ونفذ كموم = فزوعاً ماعرفنا وش ظرفها من تعصبها
تزاحم بالمحازم والليالي جوها مزحوم = ليالينا حمول جمالها تكسر غواربها
والاياليتها تصحى وتكشف سرها المكتوم = وتصمت ما تعاتبنا وحنا مانعاتبها
وياخذ غاية الحق النصيف السايل المحروم = زمن لايعرف المره علي الفاقه يجربها
تحت كبد السماء برق ورعد في مدلهم غيوم = تمر الديره المضماه ماهلت سحايبها
هذا علم وخبر والسر سلكه فالخفى مبروم = تعبره الثقاه وتعبر الغبه مراكبها
بعد ماجابنا صوت المنادي في رحب واسلوم = سلوم ارجال معروفه مذاهبنا مذاهبها
كلام الشاعر اللي بالفصاحه والحكم ملهوم = بحر غالي درر وامواج تغرق من يميل ابها
وانا مثل البشر مااعلم غيوب ولا اخلق المعدوم = لكن عقول خلق الله تميزها مواهبها

حبيبي لاتخف وأنته حرس عرشك بحـر وجبـال = عبـارة واضحـه يعنـي مراسيـنـا ترسّيـنـا

حقيقي والحقيقـة لاعجـب مـا تستحـق إجـدال = وماضيـنـا وحاضـرنـا غنـانـا لا غوانيـنـا

ولازلنا على صـدر الزمـان (مسجليـن أبطـال)= نعـم .. وامجادنـا فجـرٍ تبسّـم معجـبٍ فيـنـا

علمت أن الخطر والخوف والإذهـال روس أقـذال = تصيح بصوت يا مجنوننـا مـا شفـت صاحينـا

وفاح من الخجل مسك الجمال اللي غـدى برجـال = ومدّيـنـا يديـنـا للمـصـالـح واستبـديـنـا

تلال وجنةٍ خضراء وصحـراء خدها مـا سـال = علـى ذلـك بـروق أخيالنـا ترعـد صحارينـا

بمعنى عالـم الأمـر أول الدنيـا علـى الإجمـال = أعادتنـا صـور تسجيـل ماتـدري متـى جينـا

نسخ بالصوت والصـورة حيـاة مقـدرّة وآجـال = وسرّيـة قـدر غيـبٍ بمـا يضـمـر يفاجيـنـا

يسامحنـا قبـولٍ كـان يمنعنـا عـن الإقـبـال = يـدق نحورنـا وأبحورنـا رحـمـة ْ مناشيـنـا

من اللي ما يصدق لـو أقـول أن الحيـاة انضـال = مـن اللـي مايحـس بقولـةْ أن الحـي يحيينـا

حبيبـي لا تسميهـا سـراب ولا كثيـب إرْمـال = وأنا أفهم وانـت تفهـم ويـش تعنينـا معانينـا

لقيت أن الهوى صمت وصموت وغشمره وإبسال = يا هل ؟ يكتـب لنـا حـرف أبجـدي والاّ يقرّينـا

مراكيب الهوى العذري على جمر الغضـا زرفـال = علـى مــر الـعـذاب أتجيبـنـا ولا توديـنـا

يصورها القدر رحلة ويعرضهـا المصيـر أحـلال = يؤهـلـنـا نشوف هلالنا فـعـيـون أهالـيـنـا

روته المعركـه قصّـه واجلّتـه السيـوف إنـزال = تبلّـغ سعينـا رفـض التلاعـب فـي مساعينـا

تجلّت حالة البرزخ كهولـه فـي جفـون أطفـال = تلاحقـنـا نـجـاةٍ كنّـهـا تبـغـى تناجيـنـا

وحجم أصغر حجم ذرّة ووزن أصغر وزن مثقـال = بعـد قتـل الزمـان اللـي متـى شينـا يمشّينـا

هبط مضرب مثل واعطى الصعود لضرب الأستمثال = وصوت البحر يمدحنـا وصـوت الريـح يهجينـا

زئير القسورة لـو سبّـح الليـل البهيـم أدغـال = شفـق شمـس الغـروب إفراقنـا ولا تلاقيـنـا

حبيبي ماعليش أهوى التّعمق قبـل أطـق الجـال = على مركـب غـرامٍ مـن سمانـا زار أراضينـا