قرمٍ معـه رخصـه ومعـه جـوازي=ولا يلتفـت للـي يبـي ينشـدونـه
تلفـون قــرمٍ للمواجـيـب لازي=يفرح براع الجمس وهـوه زبونـه
البـاب مـا صكـه لطالـع ووازي=قـرمٍ وأميـر وربعتـه يدهلـونـه
مهوب من اللي يجمعـون البيـازي=ماحصلـت يمنـاه كلتـه صحونـه
من ربعـةٍ قصيرهـم مـا يهـازي=بالمـال ولأرواح يقـفـون دونــه
ضيف الله الـزراق راس البغـازي=عطـوه خطـي يـا نديـبٍ تجونـه

يا راكب اللي كنهـا فـرخ بـازي=منجوبـة خفـه وجيـد ومـرونـه
ماهـي ذلـول معرضـه للتحـازي=ولاهيـب سيـاره بشكـل ونمونـه
نوعٍ نقيته مـن خيـار الطـرازي=يصعب على أكثر ناس ما يركبونـه
مادارها الشـاوي مـرب المعـازي=ولادارهـا الــدلال وإلا زبـونـه
نوعٍ عزيـز ومرسلينـه إعـزازي=للي وصـل خطـه وجتنـا لحونـه
ونجب لنا جمـسٍ جديـد إنفـرازي=يمتاز عن غيـره بشكلـه ولونـه
الجمس جانا مـن رجـال لـوازي=ضد الحريـب وضيفهـم يكرمونـه
جابه وديـد وفيـه جملـة لغـازي=يشكي الهوى اللي ماضياتٍ حتونـه
أنا أحسبنه عن هوى البيض عازي!=وأثره عليهـن يابسـاتٍ شنونـه!
خلـه يجـره جـر دلـو الفـرازي=بيـد جـهـالٍ بلـيـا مصـونـه
يوم أنقطع منه الـوذم والخـرازي=حـوّل علـى جـالٍ حـدادٍ ركونـه
والود محدٍ عنه يـا وديـد جـازي=من عصر أبونا آدم وهم يذكرونـه
وإن كان خلك مـع جمالـه كنـازي=أحرص على لاماه وأتبـع ضعونـه
وكانه صغير وكـل خلقـه مجـازي=مـا ينتـرك للـي يبـا يطمعونـه
ولا تستمع باهل الكـلام الخبـازي=أسمع من اللـي هرجهـم يازنونـه
تغانـم الفرصـه بكـل أنتـهـازي=قدم الفوات وقـدم غيـرك يجونـه
وان كان اهل راع الكلام الميـازي=رضوا ترى عندي لمثلـك معونـه
علي أسوق إلك المهر والجهـازي=وأنتـم عليكـم بالرضـا تقنعونـه
والمزرعه تبغـا مطـق أرتـوازي=حتـى ثمرهـا للبـلـد يجلبـونـه
وأطلب وقل يالله عليـك أعتنـازي=يـا واحـدٍ كـل المـلا يطلبـونـه