تحيه معطره بالود والتقدير لعيال ميزان

كل ما أود قوله أتمنى يجد رحابة صدوركم المعهوده ولايعكر صفوكم بشيء وأن شاء الله أن الصفاء

والنقاء موجود بينا على طول . ماتعلمون قدر سعادتي البارح عندما وجدت المنتدى فكنت أبحث في محرك البحث عن محاورات بأسماء شعرائنا المميزين

كعاشق لفن المحاوره ووجدت المنتدى . ويعلم الله أني لم أكن أعلم بوجود منتدى مستقل بهذا الشكل للموازين


المهم من فرحة أخوكم بالمنتدى جلس البارح كل ليله يجوب أرجاء المنتدى يبي يشوف علوم عيال ميزان

وبصراحه وجدت كل علم طيب وكل شي يرفع الراس


لكن ياعزوتي ضاق صدري من بعض المواضيع ألي حنا في غنا عنها وماحنا بحاجة لطرق

أبوابها مادمنا في مثل ها المنبر المشهود وحتى ماودي نطرقها لو كنا في خلا خالي

فما بالكم في موقع على شبكة الانترنت أمام ناظر الجميع

فمن نتحدث عنهم ونمجدهم وهم بحق يستحقون ذلك التمجيد والاطراء

سواء شيخ ولافارس وكلهم فخرنا وأعتزازنا من كل الموازين ولانفرق بين أحد منهم


راحوا بأفعالهم وأمجادهم التي خلدها التاريخ ولن ينساها أبدا

لكن نحن أبناء هذا الجيل ماذا قدمنا؟ وش فعلنا لأنفسنا وحاضرنا ومستقبلنا

هم عاشوا حاضرهم وبنوا مستقبلهم وحفظ الماضي حقهم لأنهم يستحقون بتكاتفهم وتصافي قلوبهم

ولم يكونوا يفكرون كما يفكر بعضنا الان ؟؟؟


هل سنبقى نتغنى بماضي الاجداد فقط ؟؟ ويكون هذا التغني سبب الفرقه بيننا والتحيز


نعم هذا الحاصل هذا الواقع وكل عاقل لاينكر ذلك وبعض المواضيع التي وجدتها أثبتت ذلك

على كذا ماحنا رايحين ديره على قولتهم مع ها الواقع المشهود

وأنا أحمد الله اني ما قلت لبعض الاصدقاء من أبناء القبيله أو حتى من خارجها عن المنتدى

لأني من كثر فرحتي البارح بغيت أدق على كثير منهم وأقول شوفوا ربعي عندهم منتدى

بس يوم شفت بعض المواضيع قلت يازين الستر .... تكفون لاتزعلون مني

لأني والله محب لربعي كلهم ولاعندي تفرقه بين أي ميزاني وهذا الموضوع ألي أطلب منكم عدم الزعل فيه

وبأذن الله راح يتغير الوضع لأني اعرف عيال ميزان همتهم عاليه ونظرتهم بعيده دائما



الهديه ألي احببت أهدائها لربعي هي أني انا ياولدهم ألي يكتب ها الكلام واقوله

ليس بمقصد التفاخر ولغة الأنا لأني أكره هذه الطريقه بس كما قلت هديه على

قدر أستطاعتي وما أجيد ...محلل معروف للأسهم السعوديه في كثير من المنتديات

المشهوره للاسهم السعوديه وانا مستعد أدعم منتدى الاسهم ان كان موجود

بس على شرط أني أعرف السواد الأعظم من الموجودين في المنتدى يتابعون الاسهم أو لاء

وتكون الاجابه صريحه كما عهدناكم هذي الخدمه البسيطه ألي أقدر أقدمها لربعي على شبكة الانترنت ان احبو ومن خلال هالموقع



على العموم أهم شي ركزوا على موضوعي الاول وموضوع الاسهم نتناقش فيه بعدين

واتمنى تاخذون موضوعي بكل رحابة صدر



أخوكم ميزاني نجد