هذه قصيدة سوار الذهب موجهه للشاعر سعد بن صلبي الميزاني وفيها عتب على الشاعر صالح بن محمد خال الشاعر سعد وقد تبرع الشاعر صالح بالرد مباشرة على قصيدة سوار الذهب .
هذه قصيدة سوار الذهب :
ياراكب اللي طيبته مـن عماقـه = ناب الفقار اللـي بعـادً مماسيـه
حر" خطاه طوال من طول ساقـه = يمش النهار وداجي الليل يسريـه
قطم" فخوذه جـل ماهـي دقاقـه = يوم اصفه سبحـان رب" مسويـه
ماله عن الدرب العدال أصطفاقه = رفض" عجل ماله حلي" يحاليـه
يقطع عجاريم التـراب ورقاقـه = هميم.. نوش المطرقـه مايدانيـه
ماهو ترايستـار صنعـة حماقـه = سواقهـا مايلتفـت لـو تناديـه
ياراكبـه خلـك عليـه برفاقـه = انته دليلـه واقطـره لاتصفويـه
ممشاك عشر وجاب والهن لحاقه = يومين والا يوم بحساب محريـه
قد جيت ديرة حافضيـن التفاقـه = يوم" كـل" لـه دويـم يصاليـه
وان جودو خضر النمش بأنصلاقه = يفرقون الجمع لـو بارقـه فيـه
تشبع على اثرهم اسباع الصناقـه = فعـل" نعـده للقبايـل ونرويـه
وعسى الخيال اللي صدوق" حقاقه = تبرق ماقاديمـه وتبـرق مثانيـه
بأمر الله اللي من مناشيـه ساقـه = ان صب ماه وبارقه ينعزى فيـه
يفداه من ساقه على حسن ساقـه = يسقي ديٌرهـم والربيـع امتقفيـه
هذا وراس العلـم ياخـذ سياقـه = ونديبي الطراش مانـي بناسيـه
وليا وصلت اشبح نظرك بلباقـه = حتى تشوف البيت وتشوف راعيه
وعده لقرم" يحتمـي كـل ساقـه = حر" على ساسه جويـده مجانيـه
عشَاق هامات المراجـل عشاقـه = طيبه على جده وطيبه على ابيـه
تلقـاه للافـي يزيـد أشتيـاقـه = ماينصفق بالك ليا صرت لافيـه
تلفي سعد مكمل حقـوق الرفاقـه = وانته نديبي تبخصه مأنت غاويه
صديقي الباخص ونعم الصداقـه = رفيقي الطيـب واعـزه ومغليـه
سلم عليه وبأجود الجـود راقـه = تلقاه شغمـوم" حميـده مساعيـه
وليا اجرهد الهرج سير بنطاقـه = ثم أنشده عن خالـه الله يجازيـه
قول العهد به والشهر مع غلاقـه = يشعب حصانه والضعينه تباريـه
يشعى البعير اللي عليه الوساقـه = سرساح مع جيش الشرارات ناقيه
متنحـر" جـو" بعيـد" طـراقـه = نعم" بصالح كـل ماحـل طاريـه
وليا نشـد عنـي بنشـدة وثاقـه = عطه الكتـاب ولاتفسـر معانيـه
وقله ترى صاحبك هـذا مساقـه = يبا يجي مانايـد البعـد حاديـه
ويقول ابا اترك للعراقي عراقـه = كله يـدج وكـل سيـل" بواديـه
ومن لاعاطاه الوقت كف الحلاقه = لابد ماعجـلات الايـام تعطيـه
وهذا رد الشاعر صالح بن محمد على قصيدة سوار الذهب :
للهرج ميـزان ان تعـدى نطاقـه = تزيـد سياتـه وتنقـص حسانيـه
والنـاس فيهـا للعلـوم انـدلاقـه = وكل" على كيفـه تفسـر هقاويـه
وان صار جرح" فـالسلوك الدقاقه = يصعب على دكتوره اللي يداويـه
ياراكب اللي صنعهـا بـه ذواقـه = اسلوب فن وعقـل عالـم يقديـه
والكمبيـوتـر مايلـفـق لفـاقـه = مافيه مسمار" على غيـر توجيـه
لولا كـذا ماصـار فيهـا فواقـه = يسعى لها من كـل فـج وتواجيـه
ستلث مايبغى لهـا مـن سواقـه = تمشي على احدث علم ياجاهل" فيه
ليا نـوٌت جـو الفضـا بنطلاقـه = ترهج صليب القاع وتهز اراضيـه
ممشاك عشر اوجاب من فوق ناقه = لهـا دقيقـه يامعـنـي بناخـيـه
تاصلك قبل البن يصبـح حراقـه = لاباس واللي جـاب علـم" يوديـه
يالشاعر اللي صار فيـه انطراقـه = ومن ما بصدره مايحقـق مراميـه
انـا ادري انـه للسـان انزلاقـه = لاكن منطوقه وش اسباب داعيـه
قـدام يصبـح للجيـوب انتفاقـه = واللي يقول القول يحمـى قوافيـه
من لايميَز بالنظـر فـي حقاقـه = سوات مـن بيديـه يهـدم مبانيـه
jرى المثايل عنـد اهلهـا شفاقـه = هذا الخبر مني واذانيـك توحيـه
مافيـه للأثنيـن داعـي عـلاقـه = حتى تعلـم ذا والاخـر توصيـه
تبى تشرف مـن يشـرف رفاقـه = اونس لهيب الجمر ياللي تصاليـه
نوم الضحى للعين فيـه انسراقـه = قطاع راجي مرجله من مراجيـه
واليا صحى اللي نام عقب انشراقه = ياقف على رجليه ويقلـب اياديـه
وصقر النصافي قال لن جاك عاقه = من الرفاقه ياجـب انـك تداريـه
داره ياليـن الله يتـمـم فـراقـه = بالخير.. والا الشر محد" بباغيـه
ماجاك من دورالزمـان انزناقـه = حتى تخم الدرب الأبيض وتخطيـه
ميـر المنافـق لاتسمَـع نفـاقـه = يبغاك تنقل حمـل مأنتـه بقاويـه
واللي يغني بالمثـل مـن زهاقـه = يصبر على ماقد يجي من بلاويـه
ليا غدى لسهوم اهلهـا انزراقـه = ثم اختلـط مفهـوم مـره وحاليـه
موج" على اللي فيه صار انصفاقه = مالي طلب واقرب حدود الخطر ليه