هذا أول الدرب سيري يا خفاف الركاب=دون المسافه تعب صوت وخطاوي قصير
رفرفت مع بيرق الشاعر عزيز الجناب=وبعثرت من مجمل الأحلام شئ كثير
ما جيت ابا ادمح خطا المخطي واعيد الصواب=جيت أقسم الحق في سيف الكلام الشطير
شاعر وأبا أرقا السما وأحوم حومة عقاب=لعيون داري وحمران النواظر مطير
لين يتساوى بالأرض سهولها والهضاب=حتى أشوف بعلوي من تكابر صغير
أبفتح لكل ضلما للتعابير باب=والنور كلمه عجز عنها لسان الضرير
ما بيني وبين مفتاح المشاعر حجاب=أنا ..أنا لاني فرزدقهم ولاني جرير
أنا أكبر من الحضور اللي ملاني غياب=وانا اكبر من الكلام اللي يهز الضمير
أكتب وعين الزمن تقرا حروف الكتاب=واستطعم الخوف من حال الزمان المرير
غريب حتى مع النسيان والأغتراب=والحب طير ربى فيني وعيا يطير
مهما رمى الحظ في وجه الأماني تراب=بأذكرك يا سكر ظلالي وملح الهجير
يا سيدي في دفا بوحي لك أكبر حساب=من يوم علمتني وشلون احبك وأغير
رمى الجفا في عيونك وأرتويتك سراب=قل للمواعيد تنساني وقل للعبير
تهابني خطوة أقدامي وأنا صرت أهاب=نزف الأحاسيس ونياب القدر والمصير
لو كان كف المواصل ما تثنى وعاب=يمديك ترجع وتاخذني معك للأخير
عاتبتني وانت حتى في سكوتك عتاب=وانا أعتذرلك وعذري مثل قلبي كبير
لا تزعل اليا جفاك من السحاب السحاب=شف وش كثر كنت غير وباقي الناس غير
والله لو ا ن الذنوب براحتينك ثواب=لعيش عيشة وفا وا موت موتة فقير
ما عاد أبي لسؤال اللي بعيني جواب= وحتاج يمكن يصير أو كان؟ لا ما يصير
لا صرت شاعرك وحساسي ونبضي شباب=ماهمني المركز الثاني وقبل الأخير