هذا يا الربع في الوقت الماضي كان فيه حاكم له املاك وديار ومزارع
وبالطبع كان له حاشيه وكان من ضمنهم رجال كل ما صار شيء
ماهوزين قال عسى في الامر خيره ان قالوا فلان مات ولده قال
عسى في الامر خيره ان قالوا فلان احترق بيته قال عسى في الامر
خيره وان قالوا فلان خسر تجارته قال عسى في الامر خيره المهم
الرجال ماسك على ها الكلمه وفي يوم من الايام والحاكم جالس
في مجلسه واخوياه عنده طاحت قطعه من السقف اللي كان مصنوع
من خشب الاشجار فنزلت هذه القطعه على يد الحاكم فقطعت ثلاثه
من اصابع يده فقاموا اخوياه الي يمسكه والي يقول سلامات والي
يقول ليتها فيني ولا هي فيك ياطويل العمر واحد راح وجاب الحكيم
فقام الحكيم ووضع يد الحاكم في زيت مغلي لين وقف الدم ثم لف
عليها قطعة قماش صاحبنا راعي الكلمه المشهوره ماكان حاضر وقت
الحادثه جاهم بعد كذا وقال للحاكم اصبر ياطويل العمر وما تدري لون
في الامر خيره لك الحاكم زعل زعل شديد ونادى السجان وكالمعتاد
كان ضخم الجثه وقاله اخذ الادمي هذا حطه في السجن ولا عاد
تشوفه عيني داخل علي ,,دخله في السجن وجوه اخوياه وقاموا
يطالبونه ويقولون له انت ماتستحي على وجهك تشوف الرجال في
مصيبه وتقوله عساها خيره كم مره نصحناك عن هالكلمه
وشوفهاوصلتك للسجن قال يالربع هدوا اعصابكم ما تدرون لو ان في
سجني هذا خيره لي قالوا وبعد الى هالحين ماتبت مشينا يارياجيل
الرجال هذا ضايع الطب فيه ,,,المهم بعد شهرين طاب الحاكم لكن
نفسيته نص ونص قالو اخوياه ويش رايك طال عمرك في رحلة صيد
يحبها قلبك توسع صدرك وتشم هواء وافق الحاكم وطلعوا للبر ويوم
صادوا اجلسوا تحت هاك الاشجار وقام بعضهم يطبخ الغداء وبعضهم
يسقي الخيل وبالطبع الاكثريه جالسين يسولفون ويضحكون مع
الحاكم ....المهم يالربع طبوا عليهم قطاعين طرق وامسكوا الرياجيل
وربطوهم بالحبال واخذوا كل الي معهم من مال وخيل وجمال وطعام
يعني خلوهم على الحديده وراحوا أفراد العصابه يم زعيمهم وقالوا
ويش نسوي يازعيم في الرياجيل قال لهم روحوا افحصوهم الصاحي
اخذوه علشان نبيعه واللي فيه شي جيبوه لي أشوفه راحوا وجاء
واحد من افراد العصابه وكان (مصري اسمه بسطويسي)وقال خلاص
يازعيم فحصنا القماعه وطلعوا كلهم على سنقة عشره وصحتهم زي
الفل ياباشا بس الراقل ده معرفش ماله عنده الحته دي
مأطوعه ,يقصد الحاكم قال زعيم العصابه الله يهديك يابسطويسي
كانك ماكد جبتلي الشئ الفالح هذا ويش نبي فيه ليته بحمله يقوم
والله ماحد شاريه منا وحنا عجزانين عن مصاريف عيالنا ماهو عاد نبي
نصرف على هالازمع الاقشر لكن فكه خله يدور اهله رجع
بسطويسي وقال له اوم اواف وانته بتهرجني ابسط ياعم دي ماشيه
معاك زي الحلاوه وحظك من السماء وامك دعيالك بالمنسبه
الحاجه اسمها ايه صاح عليه الزعيم وقال عجل فكه واتركنا من
البربره الزائده قاله بسطويسي عاجبك ياعم جبتلنا الكلام ,,,المهم
يالربع رجع الحاكم لديرته واول ماوصل نادى السجان وقال طلع فلان
من السجن وجيبه لي وعلمه الحاكم بالقصه وقال بالفعل طلع كلامك
صحيح وقطّعت يدي صارت خيره لي ولاكان انا هالحين صاير عبد اباع
واشترى وضاع ملكي ويقوم الحاكم ويحب راس صاحبنا ويقول له
سامحني لأني سجنتك قاله صاحبنا بالعكس سجنك صار حيره لي
والاكان انا طالع معكم وصاير مصيري مصير الربع الي راحوا فيها ....
هذه القصه سمعتها في أحد البرامج ولكن بالطبع ليست بنفس
اللغه ولا الاسلوب وبالتأكيد لايوجد فيها الأخ المصري الذي تمت
إضافته بمناسبة حصول الفراعنه على كأس أفريقيا ....
أتمنى أن تحوز على رضاكم