ولجت ضلوعي بالحشا لجة الذيـب=لجت ولاجـت والتجـت باللزايـب
وقلت السلام ومرحبا والف ترحيب=تحيـة المشتـاق ياصـار غايـب
وهلت دموع العين مثل المزاريـب=هلت دموع العين من غير طايـب
من شوفتي دارن ولوها الاجانيـب=وذكرت ربعٍ تحت عجز النصايـب
يادار علمي بك قبل يطلـع الشيـب=رحنا شباب وجيتك اليـوم شايـب
علمي بشوفك يـوم كنـا معازيـب=واليوم صرنا ضيوف عندك غرايب
وين اهلك يادار حصـن المطاليـب=وين اهلك يادار حصـن الطلايـب
راحوا مع الجناب مثـل الذواهيـب=كل ديرتن يذكر بهـا مـن قرايـب
يادار صيحي وشقي بعالي الجيـب=صيحي وحطي فوق راسك ترايـب
من عقبنا كثرت عليك الخواطيـب=اقفوا هلك يـادار رحتـي نهايـب
صرتي هميلة قيس ونعيم ولهيـب=وصاروا هلك من كل صوبٍ وحايب
مثل الدنوع اللي يخون المعازيـب=ويفرح ليا صارت عليهم مصايـب
حنا هلك يادار مافيـه مـن ريـب=فوق المهار وفوق عوص النجايب
يادار هـذي مراحنـا والملاعيـب=وهاذي مرابـط خيلنـا والركايـب
ياما جيناك من المشاتـي تغاريـب=مثل الجموع اللي تريـد الحرايـب
بين الغراب وبين وادي سلاحيـب=اسلافنـا تثـدا ثقيـل السحـايـب
نشتي على حمدا وخبرا المواهيـب=ياما يـزل شبـاط حلـو الهبايـب
نوبٍ على خرجا ونوبٍ على السيب=بيـن البريـم والولـج والخبايـب
نجيك قلات علـى شمـخ النيـب=يقودنا (راكان) عطـب الضرايـب
ينزل بنا القفر الخلاوي ليـا هيـب=ترعى به العليا علـى كـل طايـب
واليوم صرنا لانهيـب ولاننتهيـب=ياقربنـا مـن لابسـات العصايـب
الله يعز اللـي عطونـا المطاليـب=آل السعـود مطوعيـن الصعايـب
اللي عطونا صافيـات المشاريـب=الله يصلطهـم علـى كـل خايـب
يابعدهـم عـن الرديـات والعيـب=وياقربهم للطيـب عنـد النوايـب
خلو قطيع الضان يسرح مع الذيـب=وخلو صحاري نجد تنبت عجايـب
بايمانهم يازين قضـب المحاديـب=ستر العذارى ناقضـات الذوايـب
لو شافهم حاتم تعذر عـن الطيـب=ولو شافهم عنتر يعيـف الحرايـب
وختامهـا يالله ياعـالـم الغـيـب=عفوك وانا يـارب للذنـب تايـب