لا عاد تطريني ولاجيب طاريك = قلبً نبض حبك تقطع وريده
صحيح احبك لكن اليوم مابيك = شوف المشاعر قررت ماتريده
اسرفت في حبك عسى الله يجازيك = واصبحت مثل اللي جنا الموت بيده
ليت الهوى من سم الاحباب يسقيك = وتحس ياناكر معاريف سيده
صرفت من بنك المحبين لك شيك = مفتوح وانت اللي تحدد رصيده
اقراك في نظرتك وافهمك واعطيك = وتقول ياشيخ المحبين زيده !
تزعل وانا في لحظة الضيق اراضيك = وافتح معك صفحه بعمري جديده
ماكنت اميز بين مرك وحاليك = واليوم بانت لي عيوبً عديده
ياما كتبت بنزف جرحي واغنيك = واطرز اسمك بالحروف الفريده
كنت اتفاخر فيك باسمك واسميك = واغيض به كل المسامع واعيده
ضاقت ليالي الحب وطابت لياليك = وفصل الهوى هبت رياحه شديده
رح واعتبرني ياكذب الحب ماضيك = ابعد وانا اودعك باخر قصيده