المحاورة بتاريخ 9/4/1431هـ

عبدالمجيد الظويفري
سلام الله سلامٍ فيه من طيب الرجال علوم=تقدم يالعقيلي والعلوم اسمـع معالمهـا
أنا لي مدةٍ وعيوني تراقب طيور الحـوم=غريبه كيف حامت بالسماء قدام موسمها

عبدالرحمن العقيلي
يدوم بك البقا ويدوم عزك وتحيـا وتـدوم=اخذ رديتـي ولا تستلمهـا قبـل اسلمهـا
طيور الحوم حامت والسما بعدك كساه غيوم=على بعض الديار الله يعظم مـن يعظمهـا

عبدالمجيد الظويفري
هذيك الديره اللي عدها من دونها مـردوم=لك الله يالعقيلي ما رجانـا مـن غنايمهـا
مفاليها وخام وكل يوم من الهبوب سمـوم=عسى الله بعد ماجاها القحط بالغيث يرحمها

عبدالرحمن العقيلي
لك الله دون حبـه مـن ثراهـا ماقبلنـا السـوم=هـذا حبـة ثـرا ماهـو مثـل ماقلـت يردمهـا
لاكن ان طعت شوري جوز عنها وارض بالمقسوم=اخبر اللـي سواتـك يسمـع الكلمـه ويفهمهـا

عبدالمجيد الظويفري
مادام ان الفضاء كله مجرات وسماء ونجوم=عيونك ماتخيل مـن النجـوم الا مقادمهـا
لقيتك في نعيم ولا انت لا معطى ولا محروم=وش اللي يجبرك بارضٍ تغنيلك جماجمهـا

عبدالرحمن العقيلي
ابشهد لك شهادة حق وافي من رجـال قـروم=رجال تحمى الكلمة وتتعـب مـن يخاصمهـا
لكن انت الحقيقه صدق تحسب من صغار القوم=يعـاف ام الكبايـر والنطيحـه مايحرمـهـا

عبدالمجيد الظويفري
تبا تركي ! وانا ابركي علاك ولاعلي اللوم=أبا منك القرار اللي ليا قـررت تحسمهـا
اثرك الشايب اللي لا مشا دربه يطيح يقوم=يعشق أم الفتايـل والمحـازم مايحزمهـا

عبدالرحمن العقيلي
انا بقول يوم اني ذكرت الشايب المشـؤم=اذا طاحت عجوز قريح شايبهـا يقومهـا
وترا الحر النداوي ياولد ماهوب مثل البوم=اذا شاف الفريسة فز فرحـان وتغانمهـا


عبدالمجيد الظويفري
أنا كنت احسبنك في صباك الفارس الزيزوم=كبرت وكبرت القالـه ونفـسك ماتحاكمهـا
بعد صليت لك ليله لزوم انك ليال تصـوم=قبل لا تعرف العله ليـا بانـت خواتمهـا

عبدالرحمن العقيلي
عسى الله يحفظ اللي لانصته النايبات يقوم=ابوراكـان زيـزوم الطواريـق ومعلمهـا
ينظم ملعبة ويقود جيشٍ مثل جيش الروم=الا ياسعـد ملعبـةٍ لياقامـت ينظمـهـا