بسم الله الرحمن الرحيم

السلام عليكم ورحمة الله وبركاته

حنّا بنات الوطـن وشمـوع ديجـوره
وحناّ بنات الوطن وأحلـى سعوديـه
منابت المجد وأصل المجد والصـوره
مرابـط العـز وسبـوق النـداويـه
منابت الملح وأصل الـورد وزهـوره
مكاسـر العـود والنفحـه سماويـه
عذبات الانفاس وأغلى المسك وعطوره
نفحات الاشجـان والنسمـه ربيعيـه
فوح الخزامى بروض ٍ قيـل ممطـوره
قدِ علّها مع بكـور الوسـم وسميـه
حنّا بنات الوطـن سكنـاه وخـدوره
حنّا بنـات الوطـن والثقـل ماريّـه
ياللي تعذرب بنـا يمنـاك مكسـوره
ماكـن فينـا لـك أم وبنـت وأخيـه
أفكارك السـود مشبوهـه ومبتـوره
وعلومـك العـوج ملفوفـه وملويـه
تلـف وإلا تزيـد اللـف لــك دوره
العلـم بالهـون والحاجـات مقضيـه
خذها على نـور والرايـات منشـوره
بالعـدل والميـز مكتوبـه ومقـريـه
خذها وباقي بهـا وقفـات مذخـوره
تجيك مـن فـوق وإن حبيّـت رديـه
بنت الوطن ياضعيف الـرأي مذكـوره
بالخيـر والطيـب مذكـوره سنافيـه
من أول الوقت يالمسكيـن مشهـوره
بالفكر وأحلـى التواصيـف النسائيـه
بنت الوطن ياقصير الشوف معمـوره
بالعطـف والليـن وتزيـده بحنـيـه
إن كان بالكون قالوا عينـه وحـوره
بنت الوطن من عظيم الشان حوريـه
بنت الوطن من جمال الخلق مستـوره
الطبـع هـادي ووقـت الجـد جديّـه
ممكن تقوّم بوجـه المعتـدي ثـوره
والأصـل تكوينهـا ثابـت حيـاويـه
شيهانة اللحظ بنـت الريـح منثـوره
ملمومة الخصر بنـت الذيـب ريميـه
يعنـي حجازيـة العينيـن مخبـوره
نجديـة الخصـر واللمحـه خليجيـه
ريحانة الفل بـأرض الفـل مبـذوره
يعني عسير وعبير أحلـى عسيريـه
وقـاّدة الحـس بالاشـواق دكتـوره
يضيق صدر الزمـن تبقـى شماليـه
تكتب حروف الوفا وتسّـن دستـوره
بحروفها إخلاص وإن حبّـت هواويـه
يعني هي الجو مـع بيـداك وبحـوره
من رأسهـا للقـدم بالزيـن مكسيـه
سمعت ياللي حسبتـه لعبـة الكـوره
بعض السواليـف لا سقتـه عماويـه
لا ضيّع الدرب مثلك وأخلف شعـوره
ندلّـه الـدرب والاعـمـال بالنـيـه
ياخـاوي الفكـر والعـدلات مقبـوره
في صدرك اللي لبس بلـواه صدريـه
مغرور مغرور مثلك نـاس مغـروره
بمركـب النقـص والاوهـام مبليـه
منادميـن الخطـا ملفـاه وطـيـوره
الفكـر خيـاّل والسـاحـه خيالـيـه
من الحماقه لبسـك الكبـر وشـروره
والحمق رمح الردى وحـدود هنديـه
تسكن زوايـاك والطرقـات مهجـوره
ياغراب خل الحمام إنسـى خطاويـه
لو تفرد الريش يالطـاووس مأثـوره
عواقـب الكبـر يالمغـرور سلبـيـه
ياسيّـد الغطرسـه ياقاصـر شبـوره
ياعاشق الذات عشق الـذات نفسيـه
سمعت رد الاصيلـه وإفهـم سطـوره
بسيـط منسـاب والاوزان شعبـيـه
وإسلك طريق الهدايه وإحفظ السـوره
السوره اللي علـى المعنـى ومكيـه
وإن كان نفسك على الشينات مجبوره
والنـار ياميّـت النيـران مطفـيـه
أجيك أنـا بنـت هالديـره ومأجـوره
وتشوف بنت الوطن والجمره الحيـه
أجيك وتشوف بنت السبـع مسعـوره
وأخرك معـروف والدعـوى طبيعيـه
الوقت معـروف فـي زنـات دبـوره
يخرّب العـش وهـو العـش راعيّـه
ماهي بشرَبه من الغـوري وشابـوره
بعض الحكاوي وفيه حـدود محميـه
خذها ولا أقـول لا رديّـت مشكـوره
من واجبي لا دفعـت الشـر والسيّـه
بأول خطوط الدفـاع وراس طابـوره
أصــد وأرد والـصـدّه هجومـيـه
خذها وأنا بنت قوم المجد وحضـوره
مني وأنا مـن بنـات الـدار نجديـه
من نجد ماجيت أنا المغرب وناطـوره
وماجيت حد اليمن ما كنـت مصريـه
خذها وأنا ماعرف الحمراء ولا شتوره
ولا جيت عمـاّن وإلا كنـت شاميـه
ولا نيب من بابل النهريـن وآشـوره
وإلا بعد من بنـات الشـرق شرقيـه
خذها وأنا من عظيم الشان منصـوره
من نجد ماقول أنا شقـراء وغربيـه
أعيّد العيـد مـا عوشـر بعاشـوره
الديـن الاسـلام والمنهـاج سنـيـه
خذها ونفسي على المسفـار مأمـوره
والنفس معـروف مأمـوره ومنهيـه
ماقلتها من غضب بالوقـت مقهـوره
على الملا وإن بغيت السلـم سلميـه
خذها وأنا بنت روس الطيب وصقوره
الجـد قحطـان والمنشـأ قصيمـيـه


للشاعره : ام ريم

صح الله لسانها بنت قحطان والقصيده قمه في الروعه والتركيب

عجبتني وحبيت انقلها لكم انشالله تعجبكم
&فراشة&