عبدالرحمن العقيلي
شوفو لنا ناصر الليله تراه معزوم=راعي وفا والعشا عندي وانا عازمه
نبغا لنا شاعر (ن)مثله يسد اللزوم=يقضي لزوم الرجال ولا قضى لازمه

ناصر الضبيطي
مافيه ضيف ومعزب والحزام محزوم = المنتدى للجميع وقفتي حازمه
قاضي لزومي واحطك تحت مجهر وزوم = وشلون تلزم عصا ويديك متلازمه
عبدالرحمن العقيلي
ياهل الوفا بشرو ناصر تراه مهزوم=ومن كان مرتاع مثله لعنبو لايمه
وافي و رجلٍ شجاع ومن رجالٍ قروم=لاكن مع كل هذا هازمه هازمه

ناصر الضبيطي
ما ينهزم ياوجيه الخير غير الرخوم = ياساعة الضيق ردي سالم لسالمه
ما للعقيلي خيار الا يعد النجوم = ان كان ربي كتبها كاتمه كاتمه
عبدالرحمن العقيلي
وش وصلك للرطوبه وانت كاو الهدوم=قلي وش المصلحة يااللحية الغانمة
من طب وسط البحر لابد يعرف يعوم=والا توفا عسى الله يحسن الخاتمه

ناصر الضبيطي
الخير والشر يركض جيشهم كل يوم = اثر فلسطين دوله مالها عاصمه
ناصر يعرف الدروب السالكه والسلوم = ماينطح القوم غير بقوةٍ غاشمه
عبدالرحمن العقيلي
ياراعي القدس تكفا كان قلبك رحوم=جدة غزاها المطر وطيورها حايمه
حّرح عليها الضحى والعصر يامن يسوم=وامين صندوقها خسران فمساهمه
ناصر الضبيطي
عساك تملك على الدنيا حروف ورقوم = لو ان نفسك على اللي فاتها نادمه
ان كان تبغى التجاره لاتفكر بنوم = عساك تلقى السعد فليالك القادمه