خبت ياللي من اجل المال بعت الضمير = خبت خابت وجيه اهل الردى كلها
لاكـــــرامة ولا مبــــدا ولا هــــو كثير = من ضعاف النفوس السود تنزلها
هيــــه ياللي بعقلك تحسبنك بصيــــر = مخطي المرجله من عصر ومزلها
كان مافيك عزة نفس مافيـــك خيـــر = لوجمعـت الفلـوس وصرت بنكنلها
مايكبـــرك زود المال وانته صغيــر = غير فعيون اخس الناس واذلــها
عز نفســك لوّن العمر عشتـــه فقيـر =مايعيب الرجال الفقر لوعلها
مايعيب الرجال الاانحراف المسيـــر =يقطع الله رياجيلن هذا دلها
كيف تبني بيوت الحال من ريش طير =من وهنها ليا هب الهوا فلها
جاهــل اللي يعدّك للمـــراجل تسيـــر = وانت عنها مقفّي منت مقبلها
منهج العز غير ومنهــــج الذل غيـــر = ومن نشد عن دروب العز يدلها
ون بغيت الكلام المعتبر ياغــــــرير = اقضب اخطامها والا اجلس وخلها
كل من يارد الجمه بحبلن قصيـــــر = يبا يصدر عروق الحلق مابلها
وانعدام الثقه فالنفس شي(ن)خطير =عقدتن يتعب الرجال ماحلها
ياضعيف العقل ماني لمثلك خشير =عن طمان البسيطة معتلي تلها
احمدالله سراج العز منه استنير= والكرامة غناتن مفترش زلها
والزمن لوغدت شمسه لهايب سعير=شجرة الذل مافكرت في ظلها