محاورة أقيمت ضمن برنامج ( شعراء النخبة ) في قناة المرقاب .











عبدالعزيز العازمي

ياليل ياليل السعد عسى نجومك ماتغيب ***** والحظ يجري والليال المقبلات أقفى لها
الجرح مايبرى ياعبدالله ليا غاب الطبيب ***** وإليا حضر ما إحتالت الدنيا وهذا حالها

سوار الذهب

ياليل ياليل السعد للعارض اللي مايشيب ***** كيف أربعة شالوا جمل بس الجمل ماشالها
ياخاطر الوجدان والإحساس والصمت الرهيب ***** وش حالة الخنجر ليا خضّت نحر نقّالها

عبدالعزيز العازمي

أنته صحيبي والصحابة ويش قالوا في الصحيب ***** محد(ن) مجهز له حمول إلا يعرف جمالها
البندق اللي مالها نيشان لايمكن تصيب ***** واللي يشد عمامته يثبت عليها عقالها

سوار الذهب

الوسم بيّن في جمال الضلع وجمال الشعيب ***** بعض العرب معهم عرب وأدناة ماوحّى لها
حرب البسوس أسبابها جساس في مقتل كليب ***** ماكل ليلة يسري الطرقي بنور هلالها

عبدالعزيز العازمي

الظن فيكم مايخيب وفي عتيبة مايخيب ***** آهب يابعض الجمال اللي تغر أشكالها
جساس لايرقد مدام الزير مع دربه طليب ***** ما كل دلة يالمطيري ينشرب فنجالها

سوار الذهب

في ماتقول أهم شيء أن الغريب يكون أديب ***** واليا وردت البير هات الدلو قبل حبالها
يالعازمي ماكل سوقٍ فيه دخان وركيب ***** وإن كان تقدر شدّد البدوان من منزالها

عبدالعزيز العازمي

أهم شيء أن الغضب يطلع من الوجه الغضيب ***** الله يبارك في البنوك اللي عطتك أموالها
البدو دايم بدو نعرف زادها سمن وحليب ***** مدري نقول أحسن لها ولا نقول أشوى لها

سوار الذهب

أرض الكنانة في المناخ أحوال وهلالٍ خصيب ***** والكيل بالمكيال والحسنة بعشر أمثالها
الحنشل اللي ماتطيح إلا على عقل العزيب ***** أمانةٍ قفى موصّيها ولا تكّى لها