ياعلي أخذت من الليالي والأيام=درس يجوز إني درسته لحالي
ما هو بدرس بالدفاتر والأقلام=لا بالله إلا صعب دروس الليالي
درس ملكت به الهقاوي والأحلام=وكسبت منه النادرات الغوالي
وكشف لي وجيه الحقايق والأوهام=وعلمني إني ما اتجاوز مجالي
أنا اليا هبت ذعاذيع الأنسام=صدري على صكات بقعا شمالي
واللي على الجره يرزون الأعلام=لا مكسب ليه ولا راس مالي
أموت ما حطيتهم درع وحزام=أستغفر الله عن كلام طرالي
أنا خلقت مع الرياجيل قدام=والفضل للمولى عزيز الجلالي
ما اقصر نظر عيني على حد الأقدام=ولا أستشير إلا زحول الرجالي
أدعس برجليني على روس الأقزام=ولي وطية تهتز منها الجبالي
واللي تجارتهم على بيع الأذمام=لا بد يصلاهم من الوقت صالي
أيتام لو ما حالهم حال الأيتام=من روسهم عرف الرياجيل خالي
حياتهم بين البشر مثل الأفلام=تفشل يالولا الدبلجة والخيالي
وأنا يكفيني من دروس الأيام=درسا يجوز إني درسته لحالي

يا تركي حروفك بها فن رسام=خاض التجارب وارتقى للعلالي
يزرع شعورك في تعابيرك الغام=ومرفوع شانك عن خبول المفالي
خل الرخوم اللي لها طبع سوام=ارقى السنود وبيعهم بالريالي
الحر حر وفي سماء ديرتي حام=صيده سمين ولا يصيد الهزالي
تفخر بك الأمجاد عام ورى عام=أنت القصيد اللي حروفه دلالي
يا عزوتي ياتاج راسي لي وسام=أني من أحساسك حلالك حلالي
بأخر حروفي عذر من قلب سهام=هيضت قلبي يوم شعرك صفالي
ما هزني طاري ولا هرج من لام=ومطير عماني وربعي خوالي
وتكفيك من شعري مقاصيد والهام=وأنا اكتفي في بيتك اللي بدالي
أنا يكفيني من دروس الأيام=درساً يجوز إني درسته لحالي