محاوره بين خليف بن دواس(شاعر الملك خالد)وملفي المورقي
خليف بن دواس
تحضرو ياعتيبه للبعث والنشور=واصحو بعد موتكم من بعثكم للحياه
قومٍ فسطح الثرى تبكيكم اهل القبور=ميتكم الحي ميتكم يصلي علاه
ملفي المورقي
حنا ترانا بخير ولا علينا قصور=الحمد لله في نعمه وخير وغناه
خليف مسموح لو انه يلف ويدور=ما ينوخذ شايبٍ ثالث رجوله عصاه
خليف بن دواس
العام جبتو لنا درزن بنيات حور=حمى العذارى عوانس ماعليهن زكاه
انزل ديار الحياء وجني جديد الزهور=عين الفقر ناظره في باب بيت الغناه
ملفي المورقي
نهدي لك اللي مضاربها تفج النحور=هذاه قسمك ومن دور لشيٍ لقاه
حنا ترانا يابو طارق نعرف الامور=اللي يقدم كراب الكف يعطى ملاه
خليف بن دواس
بس القنابل تفاجر والبنادق تثور=ماكنها الا حصاهٍ نازيه عن صفاه
امحنيات الركب ماني عليها صبور=نعط الولاء للولي وانته عليك القراه
ملفي المورقي
اسبح وحنا نحول مظلمات البحور=ياما سبحنا محيطٍ يغرق السفن ماه
ياخليف ياخليف داور عملةٍ ماتبور=اخير من كلمتٍ تزعل هذاك وهذاه
خليف بن دواس
قبلك سليمان بن داؤود يتلا الزبور=يسجد له الطير وهوه عالين في سماه
العام الاول مشره في سنام الجزور=واليوم ليتك تمرق من مرقت الدباه
ملفي المورقي
اعرف سليمان يعرف وش تقول الطيور=حتى إن هدهد سبأ نبأ وفسر نباه
العز ياخليف قسمي من قديم العصور=يوم إن بعض الاوادم مايحصل عشاه
خليف بن دواس
وان كان تبغى العشاء لمبرقعات الطيور=يبقى على برقعه ولا تكشف غطاه
الماء على حالته طاهر ونجس وطهور=والصالح الصالح اللي معتبر للصلاه