ياصاحبي بعدك ترا القلب مغبون=والحزن في عيني مسوي سواياه
والحب في قلبي من العام مدفون=والهم في جاشي ولاهو تعداه
بعدك ترا مركي على القلب غليون=يكوي بقلبي لين كثرت كواياه
ياوجد حالي وجد من صار مديون=كثرت ديونه والفقر قام يحداه
ووضعه اللي صار من دون في دون=مايقدر المخلاص ولاهوب وياه
والنوم عيا لايجي داخل جفون=سهر بليله يزعج الصوت بالآاه
والصبح جو بابه عساكر يطقون=معهم أمر بالقبض من قاضي قضاه
واصبح بوسط السجن ياناس مسجون=صكوا عليه الباب والهم خاواه
وربعه اللي قبل كانوا له يجون=ماحدن بوسط السجن زاره ولا جاه
همي ترا همه ولو يختلف لون=ياوجد حالي انامن البعد وجداه
وجدي على شوفتك ياترثة زيون=غرون ملكت القلب والشوق يبراه
ولاتصدق قول ناسن يقولون=البعد ينسي صاحبك شف مبغاه
ناسن على فرقا المحبين يسعون=يسعون بالفرقا وهم ناسن ارداه
والله ماأنسا دامني فيك مفتون=حبك بوسط القلب والله مانساه
انت الحبيب اللي على قلبي تمون=وانت الرفيق اللي عسا ماعدمناه
صحيح بعدك جارح القلب بطعون=يثر على قلبي ويلخبط خلاياه
لكن باقي داخل القلب مكنون=حبن دفين ولاحدن حب شرواه
وان قال ربي يابعد كل مزيون=اني لجي واضم صدرك من اقصاه
وأزعج بصوتن كل هالناس يوحون=واقول هذا رغبة القلب وامناه
ويالله ياللي خالقن كل هالكون=انك تحفظ الزين وتسلم خطاه