يالعين صيري دايم الدوم تبكين =على مدار أربع وعشرين ساعه
ارثي لعمر فات و انعيه يالعين =و ابكي على ما فاتنا من طماعه
اليوم كملتي من العمر خمسين = تلعبك اوهام الغرور ومتاعه
يا ما خدعنا الوقت بالمظهر الزين = و اليوم ياعيني عرفنا خداعه
ما ندري إن الوقت له باطن شين = الا بعد ما قام يسقط قناعه
و ان ما انتهزنا تالي العمر فالدين = ولا خسرنا ما لنا من بضاعه
باقي العمر في علم رب الثقلين = تماكني تاليه قبل انقشاعه
مع هجعه اوباش الملا لا تهجعين = احيي الدجا ذكر وتوسل وطاعه
اليا بقى ثلث ومضى منه ثلثين =وقت يربح باذرين الزراعه
لا ناموا اللي فالملذات لاهين =تضرعي لله باكف الضراعه
ويا الاذن في قول الخنا لا توحين =والذكر والنصح انصتي لاستماعه
اليا استمعتي للذكر و الصحيحين =يصير عندك ضد غيره مناعه
و يالرجل لوحيتي الندا لا توانين =اليا دعا داعي صلاة الجماعه
ويالنفس مع درب الهوى لا تميلين =بيعيه مثل اللي زهد به وباعه
الخمسة الاركان لازم تلبين =بتوحيد و اخلاص ويقين وقناعه
عسى بتال العمر ثقل الموازين =كود يتعوض ما مضى من ضياعه
سالين كنا دايم الدوم حيين =ولا دامت الدنيا لراع الشفاعه
والانبيا والاوليا والسلاطين =و اهل المروة والكرم و الشجاعه
العبد مهما عمر أحقاب وسنين = له ساعة فيه يطوى شراعه
يرحل وخلانه وربعه مقيمين = وتصير فرقا الشمل بعد اجتماعه
وصلوا على المبعوث جد الحسنين =ما نبت من نبت وما ازهر طلاعه