ياللي من الدنيا خذيتو تجاريب=وتميزون المخطيه والمصيبه
ماينتجازا بالردى فاعل الطيب=الا الضعيف اللي قريب(ن) حضيبه
فعل الرداء يفضحك عند الاجانيب=وعند الرفاقه يذكرونك بخيبه
واليا ذكر طاريك جتك العذاريب=فعل الردا خلاك تدفع ضريبه
وتسهل على اللي يلحقون المشاهيب=وكل(ن) يقول فلان ياكثر عيبه
الطيب وهبه يمنحه عالم الغيب=كل(ن) من المعبود ياخذ نصيبه
رجل(ن) ليا جت اللوزام تقل ذيب=وقت الشدايد مايحب الغليبه
متحمل(ن) ربعه بزين الاساليب=وشر(ن) على عدوانهم يندعيبه
ويعشي الضيفان من شمخ النيب=واللي بغو مثله عليهم صعيبه
والمدح يظفر به حصان المواجيب=مع الكرم يزود سمعه وهيبه
يستاهله ستر البني الرعابيب=حط الشحم والعود الازرق يجيبه