اقتباس:
يالعين صيري دايم الدوم تبكيـن
على مدار أربع وعشرين ساعـه
ارثي لعمر فات و انعيـه يالعيـن
و ابكي على ما فاتنا من طماعـه
اليوم كملتي من العمـر خمسيـن
تلعبك اوهـام الغـرور ومتاعـه
يا ما خدعنا الوقت بالمظهر الزين
و اليوم ياعيني عرفنـا خداعـه
ما ندري إن الوقت له باطن شيـن
الا بعد مـا قـام يسقـط قناعـه
و ان ما انتهزنا تالي العمر فالدين
ولا خسرنا ما لنـا مـن بضاعـه
باقي العمر في علم رب الثقليـن
تماكنـي تاليـه قبـل انقشاعـه
مع هجعه اوباش الملا لا تهجعين
احيي الدجا ذكر وتوسل وطاعـه
اليا بقى ثلث ومضى منـه ثلثيـن
وقـت يربـح باذريـن الزراعـه
لا ناموا اللـي فالملـذات لاهيـن
تضرعـي لله باكـف الضراعـه
ويا الاذن في قول الخنا لا توحين
والذكر والنصح انصتي لاستماعه
اليا استمعتي للذكر و الصحيحين
يصير عندك ضد غيـره مناعـه
و يالرجل لوحيتي الندا لا توانين
اليا دعا داعـي صـلاة الجماعـه
ويالنفس مع درب الهوى لا تميلين
بيعيه مثل اللي زهد بـه وباعـه
الخمسـة الاركـان لازم تلبـيـن
بتوحيد و اخلاص ويقين وقناعـه
عسى بتال العمر ثقـل الموازيـن
كود يتعوض ما مضى من ضياعه
سالين كنـا دايـم الـدوم حييـن
ولا دامت الدنيا لـراع الشفاعـه
والانبيـا والاوليـا والسلاطيـن
و اهل المروة والكرم و الشجاعه
العبد مهما عمر أحقـاب وسنيـن
له ساعة فيـه يطـوى شراعـه
يرحل وخلانـه وربعـه مقيميـن
وتصير فرقا الشمل بعد اجتماعـه
وصلوا على المبعوث جد الحسنين
ما نبت من نبت وما ازهر طلاعه
|
تسلم ابن مصاول ع القصيدهـ صح لسانك ولسان الشاعر
تقبل مروري وودي