يابدر زل الطيب بالطيب شره= ترى فراش الطيب مابه عذاريب
وثوب الرجوله مع هل الطيب زره=وكمل فعول الطيب يامنهل الطيب
ولايصير لك حول المناقيد جره=واحرص على نفسك وخلك كما الذيب
هذي نصيحة والد لك مبره=يباك تبدي عاليات المراقيب
والطيب حنا يالسنافي مقره=حنا مقر الطيب وحنا هل الطيب
كم واحد من طيبنا زاد حره=يمسي ويصبح في ضميره لواهيب
ومع غيضه اللي زاد نسقيه مره=لين يتجرع مع شرابه دغاليب
نسطي عليه ليا بلانا بشره=ليا صار ماله من ورانا مطاليب
ليا نوانا بالمضره نضره=والطيب ماجاله قضاه ومناصيب
والشر بفعول الردى مانجره =ولانتبع المقفي بشذب العراقيب
وترى ضعيف الناع مابه مسره=عند اللوازم من حساب الخراعيب
عزمه ردي وافكار راسه تغره=ما ينطحونه فاعلين المواجيب
والجار حنا ما نبيح بسره=والله جعل للجار حق ومواجيب
والضيف من زين المعاوش نبره=ونكمل الواجب بلين وتراحيب

ياخال قلبي كل هاجوس فره=يومنها كثرت علي الهناديب.
كثرت علي وطفت نهر المجره=وغصت البحور ومظلمات الغياهيب.
وأخذت من بحر المعاني ودره=مثايل كاللول وصف وتراكيب.
ماصاغها الصايغ ببحره وبره=ولا احد جلبها يم سوق الجلاليب.
مثايل مثل النهر مستمره=من منهل صافي وعذب المشاريب.
لوتنزفه كل العرب زاد دره=درير بِكرٍ للحلا به تذاويب.
والشعرلو هو من جلاميد حره=أصلاه لين أذوب القاف تذويب.
نضفي ستار وستر ناس نقره=وحنا نهجر العيب واهل الذواريب.
نمشي عدال بوطية مستقره=ونطلع طلوع اللي كفوفه مخاليب.
بحكمة وحزم ورايه مشمخره=ماهزها عاصوف ولا هباهيب.
وليا صلبنا الراي ماحدن يفره=مقررينه مايجي فيه تعقيب.
وحنا فرشنا الطيب في كل مره=والطيب ندرك مدته والمجاذيب.
والطيب للي يستحقه نقره=ماهوب لنا عن طوال الاشانيب.
ولايدرك الحساد لو ربع ذره=منا ولايلحق مدانا بتقريب.
خطو الحسود اللي يبا الصيد غره=يعد غرات العرب له مكاسيب.
مايدري أن دواه حنا نذره=ونحط من فوق العراقي مصاليب.
راع الردى لوقال حكيه نصره=ونزود المعنى بشر وعواقيب.
دام السبايب للمنايا تجره=لياحان وقته عارفين المضاريب.
لاجا نهار فيه فره وكره=نظهر وممشا الغير معنا تهاذيب.
بمواقف قدم المناعير حره=تشهد لها الأجناب قدم الاصاحيب.
كسر اعتبار ونكبه للمكره=أهل الحسد واهل الحكي والأكاذيب.
ولو جاك مهذار وهرجه يثره=ماكل رمح ينثر الدم ويصيب.