ياعزوتي هات القلم واتقن الخط =وعن مايدور بخاطري لاتخطا
من خوف لايلحقني النقد وانحط = واصير بعيون النشاما موطا
نقالة الشَفه لها الطيّبه عط =والدون خله بالسرائر مغطا
واكتب لابو تركي من الشعر ماشط = اللي على سِلم القبائل تسطا
ماتستوي من مثله لمثلنا قط =رميه بدون عيار عجلة منطا
وان كان قابلك بوفا لاتشرط = العفو عند المقدره له محطا
وان كان عن مايفلج الشارده نط =عود على شيخٍ له الطيب غطا
(ابوفهد) قله بماصار واحتط = خلك حريص وللعرب لاتوطا
ترى (جري ) يدرك للاحداث لوغط = دارس علوم الفلسفه والمؤطا
سلم عليه وبلغه مني الخط = وعن غير زوله يافتى لاتخطا

ياعزوتي هلل ورحب وقلط =في سدة اللي جارهم مايلطا
وبنٍ وهيل وزعفرانٍ مخلط = في دلة فوق المناره تحطا
وعُودٍ يرد الروح ريحه ليا عط = على مناعير النشاما يعطا
وكبشٍ لعكفان الشوارب يقلط =رغم الزمان اللي على الناس وطا
يستاهله من خط له يمنا خط = اللي على اسلاف العرب ماتخطا
لكن في جاره بالاسنان عرط != واظهر له المكشوف دون المغطا
وشلون لو ثوبه على المتن ينقط = مثلك يجيب له الغطا ويتغطا
بالجار والصاحب ابد مانفرط = من خوف قالاتٍ علينا تحطا
(يامضحي)اودعت المعاليق تشتط = ومن السهل نزلتني فوق شطا
شط البحوراللي بها يسبح البط = وانا ما اعرف عوم ماني ببطا
لكن اجاري من ذكرني واخطط = تخطيط مأمونٍ من العيب قطا
له مني التقدير مهما تسلط = امشي على اثره لو للاقمار نطا
شاعر على عسر المواقف مسلط = ماقف حروفه كلبوها على الطا
وانا قطاري وان مشى مايبنط = في كل موقع له مكان ومحطا