عودة أخـــرى للموضوع ...
والله يستر من توالي هالعودة (:






~ المرحلة الثالثة ~





س1/هل انتي مع أو ضد لبس العباية؟
معها بالتأكيد وأعتز بها الحمدلله ..



س2/كم عباية تملكين ؟ وما انواعها ؟ بصراااحة
هاه !!! << فيس وده يصرّف بس محشور هههههههه

الجد اني املك خمس ..
ثلاث رأس
وحده للدوام
و أخرى للكرف سوق و ما سوق ..
والثالثة للعزايم و خلافه ..
وثنتين كتف
وحده للبر والمكاشيت ..
والثانية حقت زواجات " شك و قراشيع " بس والله مالبستها بأي زواج للحين ):





س3/ما رأيك بالبنات اللي يقولون " لو أهلنا أو الدولة يسمحون لناكان ما لبسنا العباية"؟

أقولهم اللي تلبس عباية بدون إستشعار لقيمتها الحقيقية
ماعليها حسوفة لو رمت عبايتها ..
لأنها بتكون بالعباية وإلا بدونها واحد ..
فالجوهر هو المحك ..



س4/متى أول مرهـ لبستي فيهآ عبايهـ؟ وهل كنتِ مجبرهـ؟ وإلابرضاكـِ؟



يازينك وزين علومك يانزووف تجيبينها على الجرح دايم

هذا يا طويلة العمر لاني أنا اللي أبلشت أهلي إبلاش لين شروا لي عباة وأنا في الإجازة الصيفيه بين سادس وأول متوسط ..
ولها سالفة وهي إن
أبوي كان يقنعني أطلع معهم لحديقة قريبة من بيتنا كان متعود بعض
الليالي يأخذنا ويلّعبنا فيها شوي ..
وأنا مدري ليه .. حاسه اني خلاص كبرت وما عاد أحب أحد يشوفني ..
فرفضت أروح .. ومسكت معي إلا يشترون لي عباة ..
امي تهاوش .. وإخواني يتطلبوني أروح عشان مايهوّن أبوي ..
وأنا عجزت أفهمهم بوجهة نظري ..

_ يابنت الحلال إمشي ..!
<< ما أروح إلا بعباة
_ يابنت الحلال بنشري لك بس بعدين ..!
<< أبد .. عباة يعني عباة ):

ومنا ومناك ليين رضو يتركوني بالبيت عند أمي وهم يروحون يتمشون ..
وبعدها بفترة شروا لي عباة ..
وكنت أضحوكة الموسم بالعائلة أنا وعباتي

المشكله اني كنت متوقعه الأمر سهل ..
أثر العباة تبي غطا وتبي ركادة وأمور كثيرة مافكرت فيها إلا يوم بديت أعاني وحسيت إني وهقت عمري بشي ممديتن عليه ..



س5/كم تفضلين عمر البنت عشان تلبسها؟


والله يالغلا كل بنت لها ظروفها وظروف أهلها اللي تختلف بها عن غيرها ..
لكن أنا شخصياً لو كان عندي بنت بأغطيها أول ماتخلص سادس ..
حكاية انها تتأخر بلبس العباية كثير ماهي حلوة ..
أحس فيها خوف عليها .. وأنا خوافه كثير ..




س6/ما رأيك بعبايات اليوم.. الفراشهـ .. الوطواط... الخفاش وما ادري أيش بعد ... الخ؟ هل تعتقدين أن هذه الانواع منالعبايات ساترة ؟

والله يالغلا الغرض الأول من العباية " الستر "
والله عز وجل لما أمر المؤمنات بالحجاب والستر لم يحدد مايجب عليهن إتخاذه لباساً للستر ...
أخبرهن فقط بأن ( يُدنين عليهن من "جلابيبهن ")
وفي آيه أخرى ( وليضربن بخمرهن على جيوبهن )
صدق عز من قائل ..

وبعض عبايات الكتف واسعه وساترة ..
مثل الفراشة أو البشت ..
هذي أعتقد ان مابها شي وبالعكس ساتره وضافية
بشرط ما تكون مزركشة ..ولا تُتخذ للزينة ..
وعلى النقيض فيه عبايات رأس لكن تأتي أحياناً مخصرة وتعطيك تصور كامل عن تفاصيل الجسم من وراها !!
وهنا مانقدر نقول إن عباية الرأس بكل الأحوال أفضل من أختها عباية الكتف ..
بالعكس بهالحالة الكتف هي الأستر ..
خاصة انه يكون فوقها طبعاً " طرحه " لا تحدد تفاصيل الجسم ..

لكن تبقى الكتف إجتماعياً لاتحظى بإحترام مثل عباية الكتف ..




س7/ إذاخرجتي من المنزل هل تلتزمين بالحجاب الشرعي ( العباية الواسعة ومغطية العيون ولابسة شراب وقفاز )
ولا لا ؟ بصراااحة ( طبعا طلعة عن طلعة تفرق )

اكيد طلعة عن طلعة تفرق يالغلا كما ذكرتي ..
لكن ولوو ألتزم بحجابي الشرعي عباتي ونقابي وغطاي
لكن قفاز لا والله ماعمري لبسته ..
والشراب برضو ما ألبسة والله .. إلا إذا لبست " كوتش " أكرمكم الله ..




س8/نصيحة توجهيها لحواء المتبرجة ؟

ترى الآخرة تبي بعد يالغالية ..