بسم الله الرحمن الرحيم
المرحلة الأولى "
س1/ عرفينا على نفسك بشكل عام ؟
انسانه بسيطه وعاديه احب الخير للكل طيبه بزياده وعلى نياتي واصدق اي شي ( وهذه احدى عيوبي اللي ما احبها في نفسي )
قنووعه جدا .هاديه . ناس تقول عني اني مرجوجه بس مو مفهوم الرجه المتعارف عليها عند الكل لا قصدهم ان دمي خفيف
مسالمه ما احب المشاكل ولا لي فيها
س2/ ذكرياتك في اول يوم دراسي ؟
كنت هاديه جدا رحت لمدرستي بدون دموع تذكر ههه
وكانت امي تقول لاخواني وخواتي اني احسن وحده فيهم وماعذبتها باول يوم دراسه عسكهم اللي كان يبكي ومسوي مناحه من صباح الله خير واللي لازم امي تروح معه المدرسه طول الاسبوع الاول
ونتج عن ذلك حبي للدراسه لدرجة انه ماعمري غبت عن المدرسه ولا يوم وما احب الغياب
س3/ جميعنا مر بمرحلة المراهقة , ماذا تعني لك هذي الفترة؟
هي مرحله النضوج والتعود على تحمل المسؤليه
س4/ عمرتودين لو يرجع بك الزمن إليه ؟ أو يتوقف عنده ؟
ايام الثانويه والكليه كانت وناسه وحلووه جمعتني هالفتره باحلى صديقات بالذات مرحلة الثانويه
اللي كانت تجمع نفس الصديقات والطالبات من يوم كنا با الابتدائي لحد ما تخرجنا من الثانويه العامه
س5/( حب البنت للكورة يخلي النفس مقهورة )
*رأيك بهذه المقولة ؟
مقوله صحيحه بالذات بوقتنا هذا
*وهل متابعة الكرة وتشجيعها يقتصر على الشباب ؟
لا الحين ماعاد فيه فرق بين البنت والا الشاب في تشجيع الكره
* والأهم هل انتي من متابعي ومشجعي الكرة ؟ وش فريقك ؟ ( خربتها البنت هههههه )
انا من اول لا والله لا اشجع ولا احب الكره بس من فتره صرت اميل لفريق النصر واشجعه بس مو معناتها اني اروح وادور اخبارهم واتابع المبارايات لا حدي بس اعرف النتيجه اذا فازو والا لا . غيره من التعصب المعروف لا والله عادي عندي الوضع
*صديقات تهاوشوا والسبب إن كل وحده متعصبة لفريق .
* فاز الليلة الهلال بكرة المدرسة او الجامعة انقلبت استاد الملك فهد مانشوف إلا أبيض وأزرق
البنات لابسين لون الفريق والمصيبة إذا علقن صورة اللاعب الفلاني .
* خوات أو اخوان تهاوشوا والسبب إن واحد بيتابع مباراة والثاني سبب له إزعاج او غير القناة .
مشاهد كثيرة واقعة وشاهدناها بام اعيننا . رأيك حول هذا ؟
اقول قلة عقل صراحه وبعدين لو سوو كل التشجيع ولابسو من هنا لين بكره مايدل على تشجيعهم لفريقهم المفضل والا اخسرو بعض وتهاوشو بسبة الكوره ماحد درى عنهم ولاهم ماخذين الكاس
س6/الإعجاب وما أدراك ما الإعجاب .
* بنظرك : ماهو تعريفك للإعجاب ؟
* ما اسبابه ؟
الاعجاب :
هو مرض نفسي اجتماعي ينتشر في المدارس والجامعات بين الفتيات وكذلك في أوساط الأولاد
اسبابه :
الفراغ العاطفي وضعف الشخصية وسذاجة التفكير،
* أنواعه , إذا ترين ان له انواع ؟
ايجابي : مثل الاعجاب بشخص لعلمه وسمعته الطيبه وحبه للخير
سلبي : مثل الاعجاب بين الفتيات المنشر هاالايام لجمال فلانه ومالها وطريقة لابسها وغيره
* بصراحة . هل وقعتي في الإعجاب ؟ أم كنتي ضحية ؟ أي ان اخرى هي التي أعجبت بك !!
لا ما وقعت با الاعجاب.
بس ايام الكليه والتطبيق فيها حصلت بنات كثير معجبات وحالتهن حاله اللي تنتظرني من صباح الله خير عند الباب عشان تعرض علي مساعدتها وتشيل كتبي والا اغراضي واللي متعبه نفسها وتجيب لي دفتر توقيع حصص الانتظار والفراغ بس عشان اكون عند فصلها واللي مسويات تجمع واشارات اي وحده تشوفني طالعه تصارخ على صديقاتها فلانه طلعت يعني تعالن ( وانا تعالي شوفي شكلي ما احب هالحركات والوجه رايح احمر ) واللي كل ظهريه متاخره على اهلها والباص بس عشان تودعني وتقول مع السلامه يعني حالتهن حاله المسكينات بس انا بصراحه عاملتهن عادي يعني اشرح اللي علي واطلع مو مثل بعض البنات اللي الله يهديهن تمادن بالاعجاب بينهن واصبح متبادل بين طالبة المدرسه وطالبه الكليه اللي جايه اطبق وتطلع .
* كيف نحد منه ؟
بالتوجيه بالمدارس واقامة ندوات ومحاضرات عنه
س7/التشقير والنمص والتاتوه أشياء باتت ضرورية عند اغلب النساء وكأنها لاتدري ما حكمها او عقوبتها , *هل ترين انها ضرورية ؟ * وهل سبق وان قمتي بتشقير حواجبك ؟ بصراحة . إذا نعم ,هل توعدينا بتركه ؟
لا ليست ضروريه لدرجة انه لايمكن الاستغناء عنها بس اصبحت من لاوزم التجميل ولكي يضفي لمسه جماليه على الشكل
ايه سبق وشقرت حواجبي مع انه في اختلاف بين العلماء في حكمه وقد سبق وقريت للشيخ ابن عثيمين بانه سئل عن حكمه فقال بانه لابأس به
س8/ نصيحة توجهيها لحواء بشان ماسبق ؟
( ان الله جميل يحب الجمال ) بس لابد من التجمل في مايحبه الله ويرضاه وليس العكس والتقليد الاعمى
وانتظروني في المرحله الثانيه