منتديات الموازين الرسميه - عرض مشاركة واحدة - *~ حواء في حوار هادئ مع نـــــ المشاعر ــــزف *~

غير متواجد حالياً

عدت لكم بأخر مرحلتين

المرحلة الرابعة "

س1/وجبتك المفضلة؟

مافيه وجبه معينه

س2/ حادث صار لك بالمطبخ لاسمح الله ؟
صار لي حادثه في المطبخ يمكن قبل سنتين والا سنه ونص كان برمضان وكان اخوي عازم اخوياه على الفطور عاد تعرفين لازم زحمه بالمطبخ وحوسه المهم وانا جالسه اطبخ وواقفه احرك طبخه على القز( كان في الفرن داخل صينية الظاهرمكرونه بالبشاميل وفوق على القز كان فيه قدور بعد تطبخ يعني كان القز حار حتى من الجوانب ) وتجيك المحروسه اختي تاخذ الولاعه وتشغل وحده من عيون القز >> مادري وش تقولون لها انتم
وتحط الولاعه على جنب القز واجيك انا ادور الولاعه بشغل على طبخه ثانيه ويوم جيت امسكها حتى ما مسكتها اصلا الا تنفجر الولاعه بوجهي وتقب النار في وجهي لدرجة ان النار وصلت للسقف في المطبخ بس الحمد لله اول ماحسيت انها انفجرت على طول غطيت وجهي بيدي محاوله مني امنع النار توصلي وعلى طول اخذني اخوي للمستشفى بس المستشفى حسبي الله عليهم ماسوو اي شي بس جاء الدكتور وشاف الحروق وماقال شي مع اني كنت اتألم وبموت من الحراق واخرتها كتب وصفه وقال اخذوها من برى مو عندنا بالصيدليه وربي قهرني
بس الحمد لله كانت الحروق سطحيه وبعض الجروح البسيطه بيدي
والحمد لله الحين مافيني الا العافيه ولا فيه شي من اثر الحروق ياربي لك الحمد

س3/طبق تحبين تسوينه كثير؟
احب اسوي الحلويات بجميع انواعها

س4/متى تعلمتي الطبخ؟
تعلمت بدري من يوم كنت بالابتدائي بس يعني مو مره مثل هالوقت وهذا كله لاني كنت اكبر خواتي فلازم اساعد امي الله يطول بعمرها

س5/موقف طريف صار معاك في المطبخ ؟
بصراحه مااتذكر موقف لي بس فيه لاختي
كان مره اخوي طالب منها تسوي له شاهي وهي مادري وش كان عندها مشغوله واساسا وجبة المطبخ والطبخ مو عليها وقالت لاخوي لا ماقدر اسوي لك مشغوله بروح انادي لك فلانه تسوي لك عاد اخوي يحب ينرفز اختي هذي ويرفع ضغطها قال لا ماابي الشاهي الا من يدك انتي المهم قالت طيب ابشر
وتروح المطبخ وتقول هين ان ما وريتك لعانه فيها الله يرج ابليسها هههههههه
وتسوي له الشاهي وتحط سكر ومعه ملح وتكثره المهم وتوديه له
والاخ يشرب وماحس باختلاف الطعم مادري لانه كان يدخن بوقتها والا وش السالفه المهم ومن بعد ماشرب الشاهي الا المسكين كل شوي رايح جاي على دورة المياه الله يكرمكم هههههههههههههه الملح طلع مفعوله هههههههههه وربي اننا متنا ضحك عليها وهو المسكين مايدري وش الطبخه للحين ههههههههههههههه

س6/ هل يعتمد عليك في إدارة المنزل بشكل عام عند غياب الأم ؟
ايه بشكل كبير بعد

س7/يعتمد عليك في الطبخ خاصة أو لا؟

ايه نعم

س8/ اول كتاب طبخ او برنامج أو موقع اعتمدتي عليه في الطبخ ؟

اول كتاب كان كتاب الاقتصاد المنزلي بمختلف المراحل في اول بدايات طبخي بس الفتره اللي راحت كان كتاب النخبه وكتاب الاطباق المميزه وكتب ثانيه غير مواقع الطبخ اللي في النت

س9/ تحبين أحد يساعدك في شغل المطبخ ؟ او تحبي تكوني لوحدك ؟

لا احب اكون لوحدي لان اذا فيه احد معي ما اعرف اشتغل ولا اخذ راحتي

س10/ هل تتقنين جميع أشغال المنزل (نظافة غسيل طبخ )؟

ايه الحمد لله

س11/ نظامك في عمل المنزل ؟ (يعني الطبخ عليك والمواعين على غيرك ,أو يوم شغل المطبخ عليك وشغل البيت الثاني على غيرك .....؟ )ولا الله يخلي لكم الشغالة .

لا ماعندنا شغاله وابوي الله يطول بعمره مايحب الشغالات ودايم اذا قلنا جب لنا شغاله يقول وش له اجيب شغاله وانتن عندي
اما من ناحية النظام فكل وحده لها وجبه يعني يوم وحده عليها المطبخ والثانيه البيت واليوم الثاني العكس اللي كان عليها المطبخ تاخذ البيت واللي كان عليها البيت تاخذ المطبخ

س12/هل تعتقدين أنك ستكوني ربة منزل ناجحة ؟

ايه ان شاء الله

س13/ إتقان الفتاة لأعمال المنزل هل تعتقدين أن هذا شرط ضروري في نجاح الزواج او فشله ؟

ايه اكيد شرط لان الرجال يبي له وحده تهتم فيه وفي بيته مو تنام جنبه على قولة امي ههههه

س14/ نصيحة تقدميها لبنات حواء بشأن هذا الموضوع ؟ (اللي بعضهن الظاهر ماتدل مكان المطبخ بالبيت )

اقول تعلمي شغل البيت دامك عند اهلك احسن ماترجعين لهم بكره بورقتك الله لايقوله
س15/ طبق تقدمينه لأعضاء منتديات الموازين ؟ ( ياحبذا لو يطرح في منتدى المطبخ ويوضع رابطه هنا )

اقدم لهم اخر طبق نزلته بقسم مائدة الموازين الحصريه وان شاء الله قريب راح انزل طبق جديد
وهو طبق فطائر افخاذ الدجاج ..

http://www.almizany.com/showthread.php?t=34371

المرحلة الخامسة "

س1/يقال ان السر الوحيد الذي تستطيع حواء حفظه وكتمانه هو " عمرها " هل المقولة صحيحة ؟
ايه عند البعض وليس الكل

س2/ ماهي نظرتك للمرأة المطلقة ؟ وهل ترين انها مظلومة من المجتمع ؟

نظرتي للمرأه المطلقة انها انثى لم يكتب الله لها الاستمرار في هذا الزواج لحكمة ارادها الله ..
سابقا نعم كانت مظلومه اما الان لا الحمد لله بدات تتحسن وجهة نظر المجتمع لها

س3/لماذا تطالب حواء آدم دائماً بالعطف والحنان، فيما تبخل هي عليه بهما، بحجة أن حواء هي العاطفية بينما آدم هو صاحب القلب الجامد؟

لا اعتقد ان حواء بخيله في عواطفها اتجاه ادم فمثل ماتريد منه فهي تعطيه و بطبيعة الفتاة الانثويه فالحنان والعطف موجود بالفطره فيها

س4/برأيك لماذا آدم الشرقي لا يحبذ مساعدة حواء في الأعمال المنزلية ويعتبر ذلك انتقاصاً من رجولته ؟

اعتقد بسب العادات والتقاليد لان الشاب من يوم ولد وهو معروف عنده انه عيب تساعد امك والا اختك والا حتى زوجتك في البيت والا الطبخ مع ان هذا الشي ليس عيب ولا انتقاص لرجولته فيكفينا ان خير البشر عليه الصلاة والسلام كان يساعد اهله في اعمال المنزل وما اعتبر ذلك عيب له وهو سيد البشر وفي وقتنا الحالي فيه بعض الشباب ماشاء الله عليهم يساعدون اهاليهم في شغل البيت وعادي عندهم الوضع وما اعتبروه شي ينقص رجولتهم

س5/ عندما يخطئ آدم يقولون ما أحمقه , وعندما تخطئ حواء يقولون ( ما أحمق النساء ) رأيك في هذا ؟

دائم الخطاء في مجتمعنا يقع على عاتق النساء حتى ولو لم يكن هن المخطئات فلا تستغربي هذه المقوله منهم

س6/ أبي، أخي، عمي، ابني، زوجي ( للسيدات , والآنسات لاحقات خير ) ، جدي، أنتي .. رتبي التالي حسب أهميته لديك ؟

ابي - اخي -جدي-عمي

س7/ يقال أن حواء تفكر بقلبها، بينما آدم يفكر بعقله، ماهو رأي حواء بهذه المقولة؟

هذه مقوله صحيحة ولكن هناك حواء تفكر بعقلها

س8/ رأيك وبصراحة في تعدد الزوجات ؟ وهل ترضين ان تكوني زوجة ثانية او ثالثة ؟
تعدد الزوجات ورد ذكره بالقران وامر جائز للرجال وانا معه لما تقصر الزوجه بحقوق زوجها وما تهتم فيه ولا تراعيه اما اذا كانت معطيته جميع حقوقه ويروح يتزوج عليها بدون سبب فانا ضده
اما سالفة اني ارضى اكون زوجه ثانيه والا ثالثه بصراحه دايم اقول لنفسي اللي ما ارضاه لنفسي و لامي وخواتي ما ارضاه لحريم الناس
يعني ما ارضى اخرب على اي وحده بيتها وبس

س9/(آدم حنون ورومانسي- آدم وسيم- آدم جاد وصارم- آدم عملي- آدم ثري) أيهما تفضل حواء؟
بالمقام الاول افضل ادم حنون ورومانسي ولا مانع من ان تجتمع فيه الصفات الباقيه

س10/ الحياة بلا حب بلا وجع قلب احلى , صح ام خطاْ ؟ رأيك في هذا وبصراحة ؟
طبعا خطا فالحياه حلووه بوجود الحب بين الجميع بلا استثناء

س11/ الجمال في البنت أهم من الشهادة , هل ترين ان الجمال أصبح كل شيء لدى الشباب الذي يريد الزاوج في وقتنا الحالي ؟

في وقتنا الحالي اصبحت الشهاده اهم من الجمال بالنسبه للشاب وهذا عند البعض وليس الكل

س12/ الحب يموت ويذبل كما يذبل النبات . هل هذا صحيح ؟

لا مو صحيح والحب الحقيقي ما يموت ابد

س13/ هل الخيانة طبع متأصل في آدم ؟

لا طبعا
س14/ كلمة اخيرة توجهيها لآدم , حواء ؟

ادم وحواء يكملان بعضهما البعض ويجب على حواء فهم كل مايريد ادم وايضا ادم كذلك واقول له ايضا حب حواء بقلبك وعقلك وحافظ عليها حتى تسعدك لانها نهر من الحب والعطاءوانتي كذلك يا حواء

س15/ اختاري عضوة وقومي بإبلاغها على ملفها الشخصي ..

اترك الخيار لك يالغلا

ويعطيك العافيه نزوف على اختيارك لي
وان شاء الله كنت ضيفه خفيفه عليكم