الشاعر اللي مايهايط مايسوي له إعلام=وأصبح علم لو القنوات إبخلت بإعلامها
المتنبي شهرته فالشعر مافيها كلام=مشهور وبحور القصيد المتنبي عـــامهــــا
ولوماقتل من عاقبة ماقال شعراً بالحسام=ملك سطورالشعر وألغى،حبرها وأقلامها
والوقت هذا ياثقافتنا على الدنيا السلام=كثرت معاد نعرف بايعها من اللي سامها
كتايب المستشعرين آكثر من أسراب الحمام=آحيان خلف القافله وآحيان من قدامها
يبون باب الشعر مار الباب لحّم باللحام=دونه هوامير(ن)يضيع الرقم بين ارقامها
قولوا لهم لايسرعون الناس تمشي بالنظام=من لاتعين فالإداره مايعرف أقسامها
الشاعر الناشي يبي له تجربه عشرين عام=حتى يتمكن والثقافه يستحق وسامها
وشلون يبغاء في سنه يحط له بصمة إبهام=الهيمنه ديكور ماتمشي علينا أحكامها
ومن قال أنا شاعر قبيله قلت يغشاه الملام=هذا غرور(ن)صاغر العالم يزيد اوهامها
مافيه شاعر للقبيله ياخفافيش الظلام=الآغبياء لاتستعير آحجام غير آحجامها
حنّا خدمنا الشعر خدمتنا للساعات الدوام=ومشيدن أبراج شعر(ن)ماتطيح أعلامها
ولاطمعنا في لقب ولانظرنا للوسام=في خدمة الموروث وإقناع النفوس إكرامها
من المجامل مابنينا لاقصور ولاخيام=سنين والجهّال تمسك زام ماهو زامها
مجاملات الشعر ماتبني تودي للهدام=تظام صفحات الآدب ونقول ماأحدن ظامها
والشعر له هيبه وله شان ومقام=ماهو عباة(ن) يرقد البردان تحت آكمامها