بسم الله الرحمن الرحيم
السلام عليكم ورحمة الله وبركاته
اليوم بحكي لكم قصه صارت في احد القبايل المعروفه كان هناك فتاة تروح مع والدها للبر
شهر من كل سنه من تهل ضحيه وهم ماشين مايجون الا بشهر واحد وكان ابوها له صديق مقاصره يشدون وينزلون مع بعض وكان عند صديق ابوها ولد وكان عمر البنت عشر سنين والولد اكبر منها بخمس
وكانت البنت تروح لحلال ابوها على الموتر (السياره)والولد مثل ذالك وبطريق العوده من الحلال كانت تخاوى معه كانت القلوب بريئه وصافيه وتعلق قلب البنت بالبر والحلال وربطت ذولا مع صورة الولد والولد مثل تعلق بالبر والحلال وبالبنت مرت السنين ومازالو البنت والولد يشوفون بعض قدام اهاليهم واذا راحو لحلال ابوانهم يتقابلون حتى بعد ما تبرقعت (تغطت)البنت محد منعها من الحديث مع الولد او الذهاب معه للحلال ولمى صار عمر البنت عشرين وكانو مثل العاده طالعين بالبر ركبت موترها(سيارتها)وراحت للحلال كانت حاطه ببالها انها بتشوفه بس وينه ما لقته استحت تسال عنه باليوم الاول وثاني يوم لمحت لاخته قالت لها انه توضف ومايقدر يجي ماعنده اجازه وقتها البنت اشردت وضاق صدرها عرفت ان البر ماله لون من غيره حست ان اللي حولها اكشفوها طلعت من بيت الشعر وراحت تردد
اغنية خالد
خبروه اني على وصله حييت
وان تفارقنا ترا موتي دنا
وقبل لايرجعون للديره باسبوع جاء الولد وقبل لايروح لاهله توجه للحلال حق ابوها
وشافها ببرقعها وعرف من عيونها انها كانت تبكي نزل من موتره وراحت تركب موترها سالها علامك قالت انا مره ورجال مايجوز نجلس كذا لمى شغلت الموتر سمعته يقول ماجابني مناك الا الشوق
وراحت للخيام ومانامت من كثر ماهي مستانسه ويوم اصبحت ماراحت للحلال خافت من كلامه البارح
واليوم اللي عقبه راحت ولقته قدامها وسالها بالله ان كانت تحبه تقول ايه وتترك الباقي عليه قالت
من عشر سنين هويتك وعديت الايام لشوفك
حبها وحبته حب برئ مافيه من العيب شيء ولمى كلن رجع لديرته جاب الولد اهله يخطبون
وكان الرفض بالمرصاد لاسباب مالها دخل بالدين لسبب ان اولاد عمها احق ولسبب التحجير من عيال عمها ولسبب ان اللي حبته من قبيله غير قبيلتها!!!!!
ابعدوها عنه بدون رايها ومازالت تعد الايام للقاء ومابقى غير 9 ايام على شهر 12 ومابه خبر ان اهلها بيقاصرون اهله
عندي سؤال بعد هالقصه الحقيقيه وش اللي غلط فيه الشاب؟؟ لانه جاء البيت من بابه؟؟
وش اللي غلطت به البنت علاقتها به كانت مكشوفه ولا مالها قلب تحب وتنحب؟؟
هل هذا هو الحب العذري؟؟
ابي ارائكم في ان البنت لازم تاخذ عيال عمها وانه ماتتزوج من خارج قبيلتها؟
ولو عندك بنت بتزوجها غير عيال عمها؟
مارأيك بالتحجير؟؟