على جبال الموج لازال بابور = وعلى جبال الارض يلغى مجاله
صمت ومتاهات وشريعة ودستور = وكِِِتاب عدل وعدل ياآهل العداله
ضاع الصحيح وصح من يتبع الزور = كباير الآثام زاده وماله
وترى شعاع الشمس مايحجب النور = لكن ضعيف النور نلقاء بداله
الصدق يبقى بيت مبني ومعمور = يدفي ذراه ويستظلك ظلاله
مثبت(ن)ساسه عن الظلم والجور = وزلازل الاحقاد ماتهز جاله
من دونه التقوى ثمانين طابور = وعلى علم راعيه لفظ الجلاله
يدخل به الزعلان ويروح مسرور = إمّا إعطي له حق والإ حباله
راح الصحيح اللي به الحق منصور = وطالت حبال اللي قصار(ن)حباله
أيام قد مرت لاأهلنا على الكور = يوم الصحيح وقوّّو بأس الرجاله
يوم إن للخوّه تواريخ وعصور = ماهي عصور المهزله والنذاله
نعيش فالدنيا مطاليق ونمور = مهما يمر من الردى والجهاله
ونقدر الاصحاب تقدير مجبور = والإ حثال المجتمع للحثاله
كفيت ماخليت مدخال للعور = الإ البصير ونظرته وإحتماله