( تابع ) تغطية الحلقة الثالثة






تحصل على المركز الثاني من ضمن شعراء الحلقة الثالثة ممثل الموازين في المسابقة الشاعر الكبير نايف بن غايب المريبيط الميزاني .


وقصيدة تحتوي الكثير من العتب على بعض من يرافق للمصلحة وينسى المعروف , و تدل على روح الشاعر الطيبة وتفانيه في سبيل صديقه الصادق , وتساميه عن بعض الأمور وارتفاع مبادئه التي تعلمها وورثها من والده الذي رباه على السمو وأرتفاع الهمه وبعد النظر .


أحتوت القصيدة على كثير من الجماليات وابياتها تغني عن التعليق :

الشعـر دربٍ خذانـي ليـن ودانـي = ابعد مسافات مـن كونـي وتكوينـي
وقفت في شرفته وأوجست خذلانـي = وأخذت أحسّب خساراتي من سنينـي
لقيتني ما ربحت إلا صدى أحزانـي = وآمالـي اللـي تبعثرهـا عناوينـي
وحلـمٍ خذانـي معـاه ولا تحرانـي = عند اقرب أول محطة غاب عن عيني
وعـوّدت بالذاكـرة لأيـام خلانـي = وأصحابي اللي رووا بـزلال كفينـي
ومرت عليّ الوجيـه اللـي تمرانـي = وقمت افرز أشكالهم وألعن شياطينـي
يا كثرهم وقـت حاجتهـم لميدانـي = ويا قلّهم بعد ربحـوا مـن ميادينـي
والصاحب اللي نبت ريشه بجنحانـي = وقت الهدد بار صيد القـوم بيدينـي
ما يدري انه خفيف الريش ما أشقاني = ولا نوّخت في حراه اهزل بعارينـي
الطيب روضٍ عليه أسسـت بنيانـي = والمجد انا ابنيه والنومـاس بانينـي
يوم إن غيري مناه يشوف حقرانـي = انا اعترف في نجاح اكبر معادينـي
ما عشت دور الضعيف ولا تعدانـي = إلا حصـانٍ بطمـراتـه يحاليـنـي
ورفيقي اللي علـى الهقـوة تمنانـي = يبشر بعزه لو أنحـر لـه شرايينـي
على جزال العطايـا ابـوي ربانـي = الله يرحـم عظـام اللـي مربينـي
والحاسد اللي مع الغبشـة تقهوانـي = من مره اسمي شرق بأول فناجينـي
ذكري ليا جا يقـوم بـدور نيشانـي = وان غاب ذكري تمني يـا سكاكينـي
والشعر خيلٍ عليه أسرجـت قيفانـي = اعطيه جهدي ولا انطر ويش يعطيني
بنيـت قصـري بمشرافـه وبيبانـي = عليه وسمي مثـل وسـم البعارينـي