السلام عليكم ورحمه الله وبركاته
هذي قصيده كتبتها بمزاين أبل قبيله مطير
ودو سلامي يالعيال المناعير
....للي يشيلون الحمول الثقيله
سلام للشجعان واللي بهم خير
.... سلامن أحلى من شراب الثميلة
العلم واضح مايبى العلم تفسير
.... لأهل الوفاء والجود وأهل الفضيلة
البل ليا جت للمزاين مقاطير
.... تبر الكبود اللي منول عليله
البل مع الوبال صفر ومغاتير
.... مثل الهبوب اللي تسوق المخيلة
بكرة ليصفوا وراها طوابير
.... كلن يقول البل هذي الأصيلة
مع عيد بن شارع زبون المخاسير
.... واللي سواته كل حملن يشيله
فالبل عطايا الله يسوق الدنانير
.... يبي ليا حط المزاين يجيله
والجيب يبرى للنياق المصاغير
.... جيبن جديد وتو ورد من مديله
والبيت بابه فاتحه للمسايير
.... تلقا به الضيفان بيت العضيله
اللي يجي من نجد وأم المغاوير
.... فرصة لمن جاهم وهي تستويله
بمزاين البل رافعن رايت امطير
.... حي الرجال اللي تعز القبيلة
بمزاين البل صفقوا يا جماهير
.... ويحقق الصعبات والمستحيلة
ياعيد بن شارع ليا غرد الطير
.... منزالكم يا عيد رأس الطويله
الفعل طيب والمبادي على خير
.... والطيبة ماهي سوات الهزيلة
لك من ذوي ميزان ياعيد تقدير
.... لأنك من اللي ينفعون القبيلة
لأنك شجاعن ماتعد المخاسير
.... بلهان شيال الحمول الثقيلة
وراع الكرم والجود مافيه تقصير
.... الله يجملنا بــــراع الجميلة
راعي ادلالن مكرماتن مباهير
.... فنجالها يبر العماس ويزيله
والرزق عند الله ولي المقادير
.... والدرب واضح مايبيله دليله
تقبلوا تحياتي
مشعل بجاد الميزاني