بسم الله الرحمن الرحيم
السلام عليكم ورحمة الله وبركاته
اليوم جيت ومعي موضوع اود مناقشتكم فيه وهو يخص فلذات اكبادنا بالمستقبل
دائما اسمع بين الحريم اذا بغت الحرمه تعذر على ولدها قالت صغير مثلا اذا قال ابوه
باخذه معي للبر قالت اخاف ولدي صغير<<ترا عمر الولد جاوز العشر سنوات
اذا طلعو للبر او للمزرعه وقال ابوه بعلمه السواقه قالت صغير<<انا بعمره قد سقت وبروحي
اذا جت مناسبه لبسته بدله(بنطلون وتي شيرت) لا قال لها احد ليش مالبس ثوب وشماغ
تقول ليش طعس ؟؟؟!!!
اذا خذا النبيطه<<لحد يقول ما اعرفها
وراح يصيد عصافير ضربته يقال انها بتأدبه ما تدري ان النبيطه تعلمه على القنص والتركيز والثقه بالنفس
واذا لمس له ناقه ولا مسك جربوع تقوم الدنيا ولا تقعدها
حتى صلاة الفجر ايام البرد حريم واجد تحن ولدها من القومه بس خله يتاخر عن المدرسه
شوف وش بتسوي!!!
وتعالو شوفوها اذا جت وهو حاط على قناة قصايد ولا شلات ولا محاوره تنجن الا شوي
ازعجتنا وتهاوش وحالتها حاله بس اذا شافته حاط على فديو كليب فنانه وقاعد يترقص
تصفق له هذا اذا ماصورته من زود التشجيع
واذا تهاوش مع احد بالمدرسه ورجع للبيت تغسل شراعه وتضربه هذا اذا مانقلته من المدرسه
بدال ماتاخذ اللي بخاطره وتسولف معه وتفهمه الطريقه الصحيحه للتعامل مع الناس ومتى يمد يده وانه اذا احد غلط عليه ياخذ حقته تنمي فيه الشجاعه
وبعد كل هالامور وين تبي تربيه ؟؟؟؟؟؟
اذا كان عندك ابن ترضى يكون من هؤلاء؟؟
هل تعجبك تربية الام لابنها بهذي الطريقه وتخلي الاب عن المسؤوليه؟؟
كيف تربي ابنك ومالذي تعلمه منك؟؟