دعانا من هقى فينا وجينا رافعين الروس = تسابقنا مع اللي يخلف الهقوه مسابقها
الا مايصعب الموقف والا يامااكبر الناموس = على سيف العرب عز النشاما لاح بارقها
بعد ماذاعوا أسمي في رواسي حضّر الهاجوس = هجوس الشعر ينخى الفكر والجزلات يعشقها
هجوس(ن) له ثمان سنين في صدري وهو محبوس = حبسه الحظ طول وعرض والبيبان مغلقها
صبر حتى ظفر بالناقد اللي ماعليه حروس = يوضّح مانقد بالشعر والمسؤول وثقها
وأنا من غير كبر وغطرسه شاعر بدون دروس = وهبني ربي بحور الشعر وأغوص بأعمقها
أغني بالهلالي والهجيني والعب المنكوس = وعلى الرجز وعلى الهزج وعلى المسحوب نطرقها
تفاخر ياهجوسي وأنتبه لاتدعس المدعوس = تنق امن البكار الغفل وسط السوق وافرقها
اليا اخضرت بساتين المعاني والرجال عسوس = أحد يقطف زهر منها وأحد ماغير يمحقها
خذيت من المواضيع المهمه واحد(ن) محسوس = يرافقني ومقلقني وبعض الناس مقلقلها
دخل موروثنا الشعبي وديوان العرب كابوس = يطارد كل شعّاره ويخدم من تسلقها
نتايج من تجارب حاصله بالواقع الملموس = نشاهد ماحصل في مغرب الساحه ومشرقها
مادام اني على المنبر وأخاطب ريس ومرؤس = ابا اوجّه رساله ياعسى كلن يطبّقها
أخص مسابقات الشعر والتصويت هدر فلوس = ضياع المال ماينصف ولايظهر حقايقها
ولانقصد ولانحسد وقولي ماعليه لبوس = مجرد فكرة التصويت مانقبل مرافقها
دخوله فالشعر مثل السنون اللي دخلها السوس = دخل فيها وحفّرها وكسّرها وفرّقها
لاشارك شاعر(ن) يدعم يحوس أهل المواهب حوس = خذا الأول عليهم والنتيجه من يصدقها
عرفنا نصفها الظاهر ويبقى نصفها مطموس = جميع مشاهدينه مادروا وشلون حققها
ولو فوزه حقيقي قالوا أنه فاز بالمدسوس = تبلاها بكثر مصوتينه لين عانقها
وغيره شاعر(ن) يفرك كفوفه والصدر محموس = زهم ربعه تصوت له وحمّسها ووهقّها
ولو شعره يجمّلهم وقف له حظه المنحوس = رجع لاذي ولاهذي ونفسه عاد محرقها
معاريف النشاما وسط قلبه مثل حد الموس = ولايقدر يجازيها ويحصيها ويلحقها
علشان الحميه والحميه حبلها ممسوس = بعضهم بالسلف والدين جامعها ومنفقها
أدبنا من تعاملنا وصل في حاله الميؤوس = على حزنه شواعير العرب رزت بيارقها
اناشد كل حكّام الخليج تعالج الفيروس = قبل ماينتشر ويبث سمه في مناطقها
الا يامولع الفانوس حذرا تطفي الفانوس = سنا ضوك بعد شبيتها يبهر تدلقها
حرقت اللي برز وأثبت وجوده بأول القاموس = جميع منافسينك قمت تلحقها وتفهقها