يارب نفس صبرها هدّ حيلها=من همها اصبح صبحها مثل ليلها
يارب نفسي ياوديع السراير=باعتني لقاح الليالي حصيلها
اليا سرح هم ضوى هم غيره=يدّن راعدها ويمطر مخيلها
سحابة سودا كما ليلة الدجا=تنهب علوّ الارض مافاد سيلها
يصب ماها بس مايقطع الضما=تقبل وربي عالم وش بقيلها
يارب تجعل ماحصل لي مغفرة=من الذنوب اللي عجزنا نشيلها
محايل تعجز على شيلها الحيل=في ضف سوداً قام يومي شليلها
الادمي مخلوق مايعرف الخفا=والاقدار عسكرها على ضهور خيلها
من يامن الدنيا يفاجيه غدرها=تحجّه بحجه ماعرف وش دليلها
تجهز عليه بحجة جاهلية=تطوُىَ عدالتها تحت خف ميلها
تغطّي مغرّتها على حسن وجهها=تبدي مفاتنها وترخي جديلها
تجرنا في سكة الغي والهوى=دقت خلاخلها تشوّق خليلها
نسج باحلام بعيد مداها=من كثرها مانقتنع في قليلها
فتنة ومضمون الفتن غفلة الفتى=عن وقفة كل البشر تحتسيلها
هذا وانا بالوضع داري ومقتنع=حسيت ميزان الدعاوي لكيلها
لي في ميادين التجارب تجارب=اكب الخطا والمخطية ماآعنيلها
على شان راع المخطية قاصر الخطا=نفسه محاصيل الردى من حصيلها
عزّي لمن تقصر نعم دون شاربه=القاصره تنصاه لو مايجيلها
وروده مشاكيها ضماها يضيمها=عن بارد الجمّة يحدّه نثيلها
والطيب والمعروف والعرف قسمنا=ناخذ من خيار المعاني جليلها
وللطيب بيت منزله عالى الحجا=يذريه من وصل الاصاله وآصيلها
كبرنا تحت ظله وسرنا بهيبته=على عزّة يشعل قبسها فتيلها