حياتي يابعد روحي فتنتي قلبي المهياف = غدت روحي من اسبابك ادورها وما القاها
صويب عيونك الخدره قتيل المبسم الشفاف = رهين رموشك اللي تطعن العاشق بشلفاها
لقيتك ياملاك البيض عُمله تتعب الصراف = جواهر من ذهب في بورصات العشق مرساها
لقيتك ياسمين يسوق ريحه نسمة الغرياف =لقيتك ورده لشوق القلوب يحقق رضاها
صدى صوتك يسامرني واعيش بعالم الاولاف = كأن بعالم الوجدان روح تعيش نشواها
انا اللي جيت لك ماجيت لي ياكامل الاوصاف = على راحت كفوفك بصمة العشره طبعناها
تجي والا تروح الحب باقي والقلوب نظاف = تزيد بغيبتك معزتك وان جيت تلقاها
سمو الحب مابيني وبينك ماعليه اصداف = مثل شمس الضحى اشعاعها يكشف محياها