ياشباب المسلمين عقولنا تمجدنا=بس حنّا مانفكر وش يبآ يقفانا
لو نفكر زين فاأيام(ن) تبآ تبيدنا=كان قلنا ليتنا من صغرنا صلانا
وليتنا طعنا رسول(ن)للهدى يرشدنا=وليتنا قمنا بحق أم(ن)وأب(ن)ربانا
وليتنا عاصين شيطان(ن)يبآ يبعدنا=عن طريق الخير لين نروح في عميانا
قام يقنصنا سوات الصيد ويصيدنا=وأول الصيدات يوم إنا نحلق لحانا
ليش ما نعصا مريد(ن)بالفتن قاصدنا=زيّن الدنيا لنا بعيونا وأغوانا
ونطرد الدنيا ودنيانا تبآ تطردنا=لين تَلحقنا وتِلْحقنا طريق آبانا
كل يوم الموت له هدّات ويهددنا=مستحيل الموت لو طال الزمن ينسانا
والله إنا عارفين إنه يبآ يفردنا=عن قرايبنا وعن زوجاتنا وأبنانا
مار توبوا توبة(ن)من نومنا تقعدنا=لين نصحي مع طريق الدين في دنيانا
السعد في طاعة اللي طاعته تسعدنا=رب(ن) ألبسنا لباس العافيه وأغنانا
واحد(ن)ماله شريك ومن عدم موجدنا=عقب ماكنّا بنطفه راكده نمّانا
نطلبه من رحمته ورضاه لايطردنا=ندري إن الله يعاقبنا لكن آخطانا
ويالله ارحمنا وعن طاعتك لاتبعدنا=ويالله اصلحنا وعاونا ولاتبلانا