ياراكب اللي لانويته ابمطراش=يعجبك ماهمه بعيد المطاريش
اليا سريته ليل ولا ابمغباش=يطويلك السرعه ولا هوب بكديش
اليا انطلق كنه مهرب ومنحاش=مطرود والعسكر اخلافه كما الجيش
خذوا امر بالطلق من بطن رشاش=والطلق من دونه وحوله مناويش
لو كان لاداشر ولاهو بحشاش=لكن ظروفه تجبره للمعاويش
صحيح مذنب بس لابد يعتاش=سواقه مراهق ومعميه هالطيش
بي ام دبليو حي من ورده عاش=يالله عسا الناغي تعافيه بالعيش
ومصممه ماهو بخادع وغشاش=لو كان ملحد بس مابه مغاشيش
اليا ركبت بداخله يدهش ادهاش=من كثر مابه من زيان ودناديش
اليا دعست سليتره وانشلع طاش=خلا المواتر من يمينه مطاشيش
من سرعته ماكنه الا طلقة كلاش=اسرع من السرعه وصوته له اوشيش
ابيض تقل لونه مثل بيض الارياش=اللي كما الغرنوق ينهبه الريش
خلك على السرعه ولا همك فلاش=لو صورك ساهر مع نقاط تفتيش
منصاك للي وجهه ابيض من الشاش=اللي على فعل المكارم يبا يعيش
اللي ليا منك نصيته ماينحاش=ماهوب باللي طنش الضيف تطنيش
هذاك لأنه ماخذا الطيب ببلاش=الا على فعل المراجل ترا يطيش
هذاك كساب المعاريف حواش=يومن غيره للردايا محاويش
اليا نخيته ماتوانا ولك شاش=يفزعلك بسرعه ولاهوب بشويش
اللي ليا منه فزع يبرد الجاش=يروي بفزعاته كبودن معاطيش
ولاهوب في لحم المقفين نهاش=ولاهوب لاش ولا مخاوي مكاديش
وختامها يابوعوض هاجسي طاش=والقاف سوا داخل الراس تشويش
حبيت اسلم ياابيض الوجه كالشاش=واسند عليك القاف ياجعلك تعيش
ولانيب محتاج(ن) ولا وضعي ابماش=ياراعي البلها فدوك الدراويش