ياحرف قل للزين يمهل جنابي=ابغى دموعك تكتبه في غيابه
بكتبك واكتب بالمحبه كِتابي=حرف الغلا فايح بْصفحة كِتابه
ودي يجيني يوم واشرح صوابي=ويحس في قلبي وقالب عذابه
يْشوف حبه كيف صده عثا بي=جسمي نحيل ٍ والنحاله صوابه
تحت مليل الوصل جمرة عذابي=الجوف يطبخ شوق حب ٍ سطابه
جند المشاعر استحلت شبابي=واستوطنت بالقلب صورة جنابه
اتخيل أيـــــــامه وتفصيل مابي=عطر ٍ تْغرّد ريحته في هلابه
ازعّله وارضيه واكتب عتابي=ومن زود مااحبه محيت الكتابه
هو منبع لْْعِطري تغنّا ببابي=فوّاحة ٍ فاحت بداخل ثّيابه
له الوفا بنك ٍ وصدره حسابي=وايدعت من بنكي بْخزنة حسابه
وليا عتب فاحت تغاريد مآبي=مآبه ومابي من قوارير مآبه
موجة رحيله عوقها في ذهابي=في سرعة المشوار صار التشابه
ودّعت قلبه حول قوسين قابي=قلبي وطن ماغيره احد ٍ مشابه
من عقبها بقيت لغز بْْحسابي=كني سؤال ٍ مالقوا له اجابه
مغمور في بحر المحبه جوابي=غرقان يرجي بالسواحل ترابه
اخطى على قلبي ونطّق خطابي=خلاّ فؤادي كل حزن ٍ زهابه