لجل جيل ٍ له حياة ٍ باقيه=ودي التاريخ يكتب مايضيم
في مساحات الخَبر متماديه=ألسِنة كفّار والخافي أليم
من زمان العُرب ارضه راويه=دم ذل ٍ واضطهاد ٍ من ذميم
ارض يَعرُب من دماهم جاريه=والعظام القاسيه باتت رميم
لو نطق نَفْط الديار الظاميه=قال متحلل من ارجال وحريم
تنفلق قطرات دم ٍ ناميه=تنبت انسان ٍ من الظُلمه ظليم
تونس الخضرا صورها حاميه=بو عزيز محمد ٍ شب الجحيم
من شراره طاح حاكم طاغيه=والبِليّه سورها شر ٍ قديم
ظَاهَرت مصر و تحرّك شاميه=واليمن منها ينادي يارحيم
العريقه مصر ترفس داميه=والبواسل ولعوها مع غُنيم
مع فتاة الفيس نذكر داهيه=شبّت النيران من ضلع وهشيم
ضاع حسني والخفايا عاريه=والعرا مايستره ثوب ٍ خريم
انكشف وائل وصارت كاويه=ماسوني مغويه ملعون ٍ رجيم
ينفخ النيران تسعر شاويه=ساحة التحرير لِمبارك خصيم
طاح حسني من ذياب ٍ عاويه=وانبلج نور ٍ بعد ليل ٍ عتيم
وزنقت المزنوق ماهي خافيه=كم يتيم ٍ بالبلد يبكي يتيم
كم كفوف ٍ سُود مِنّا كافيه=راح دم المسلمه سين ٍ وجيم
بن معمّر انحشر في زاويه=مستطيل العنف ولّع بالغشيم
قرّبت للقلب طلقه قاضيه=والمنايا امرها عند العليم
من بلاده للبلاد الساميه=ساميه بالعاهل الشهم الكريم
في قدومه كل فج وناحيه=كَبروا بالشكر للمولى العظيم
فرحة الشعب ابوفاها ساريه=بالمزن متلحفه والعطر ديم
تاج جود وريح عُود ٍ صافيه=بالصدر شوفك ذعاذيع النسيم
كلنا دونك رياح ٍ عاتيه=والصدور جْبال درعك ياحكيم
الوطن روحك وروحك غاليه=الله يْعزّك على الحق وتقيم
ماتزحزحنا نفوس ٍ باغيه=نزع الامن اللي تذرا بك مقيم
يا ملكنا لك عيال ٍ وافيه=شاربه ودك وحبك بالصميم
ديرة الاسلام قبلة ناصيه=صانها الله والحشيمه للحشيم
قالها شاعر حروفه واعيه=ودّه التاريخ يكتب مايضيم